The news is by your side.

Advertisement

ٹائیگر فورس کا ٹیسٹ رن مکمل، آج سے آپریشنل ہوگی

اسلام آباد: وزیر اعظم عمران خان کی ہدایت پر قائم ٹائیگر فورس کا ٹیسٹ رن مکمل ہو گیا، آج سے یہ فورس آپریشنل ہوگی۔

اے آر وائی نیوز کے مطابق ٹائیگر فورس کا ٹیسٹ رن مکمل ہو گیا، آج سے یہ فورس آپریشنل ہوگی، وزیر اعلیٰ پنجاب عثمان بزدار ٹائیگر فورس کا باضابطہ افتتاح کریں گے۔

ابتدائی طور پر سیالکوٹ میں رضا کاروں کو ذمہ داریاں سونپی گئی ہیں، رضا کاروں کو مساجد، یوٹیلیٹی اسٹورز کے باہر تعینات کیا گیا ہے، جہاں سوشل ڈسٹنسنگ گائیڈ لائنز کو یقینی بنایا جا رہا ہے۔

سیالکوٹ سے ٹائیگر فورس کو میدان میں اتارنےکی شروعات

ٹائیگر فورس کو ضلعی انتظامیہ اور مقامی پولیس کا تعاون بھی حاصل ہوگا، یوٹیلیٹی اسٹورز میں سامان نہ ہونے پر ضلعی انتظامیہ کو شکایت کی جا سکے گی، عثمان بزدار کا کہنا تھا کہ ٹائیگر فورس کی سافٹ لانچنگ کا تجربہ کامیاب رہا۔

انھوں نے کہا کہ ٹائیگر فورس کے سلسلے میں عوام کا تعاون اور رد عمل قابل ستائش ہے، نوجوانوں نے قومی جذبے، محنت، لگن سے ذمہ داری پوری کی، آج سیالکوٹ سے ٹائیگر فورس کو باضابطہ آپریشنل کر رہے ہیں، اور مرحلہ وار ملک بھر کے نوجوانوں کو مکمل طور پر متحرک کر دیں گے۔

گزشتہ روز معاون خصوصی عثمان ڈار نے کہا تھا کہ سیاسی وابستگی سے بالاتر ہو کر عوامی نمایندے ٹائیگر فورس کی قیادت کریں گے، ضلعی انتظامیہ کی جانب سے سیالکوٹ کے تمام ارکان اسمبلی کو بھی خط لکھے جا چکے ہیں۔

Comments

یہ بھی پڑھیں