پاکستان سپر لیگ سیزن 7 میں دھواں دھار بیٹنگ کرنے والے ٹم ڈیوڈ کو انٹرنیشنل سطح پر نمائندگی کا موقع ملنے کا امکان ہے۔
سنگاپور میں پیدا ہونے والے ٹم ڈیوڈ کو ممکنہ طور پر دورہ پاکستان کے لیے آسٹریلیا کی وائٹ بال ٹیم میں منتخب کیا جا سکتا ہے۔
دی ایج کے مطابق ڈیوڈ ٹی 20 میں اپنی شاندار کارکردگی کے بعد آسٹریلوی سلیکٹرز کے لیے مرکزِ نگاہ بنے ہوئے ہیں وہ پاکستان سپر لیگ (پی ایس ایل) سیزن 7 ملتان سلطانز کی نمائندگی کرتے ہوئے 205.26 کے اسٹرائیک ریٹ سے 234 رنز بنا چکے ہیں۔
آسٹریلوی وائٹ بال کے کپتان ایرون فنچ نے بھی تصدیق کی ہے کہ ڈیوڈ قومی دلچسپی کا کھلاڑی بن گیا ہے اور اسے پاکستان کے لیے منتخب کیا جا سکتا ہے جہاں آسٹریلیا 29 مارچ سے 5 اپریل تک تین ون ڈے اور ایک ٹی ٹوئنٹی کھیلے گا۔
فنچ نے کہا کہ اگر ڈیوڈ پاکستان کے دورے کے وائٹ بال کے لیے اپنے پہلے آسٹریلوی اسکواڈ میں شامل نہ ہو پائے تب بھی اکتوبر میں شروع ہونے والے ورلڈ کپ سے پہلے ان کے لیے گرین اور گولڈ میں ڈیبیو کرنے کے مزید مواقع ہوں گے۔