ریاض: سعودی عرب میں ٹریفک جام کا مسئلہ حل کرنے کے لیے اسکولوں کے اوقات میں تبدیلی پر غور کیا جا رہا ہے۔
اردو نیوز کے مطابق سعودی دارالحکومت ریاض میں محکمہ ٹریفک کے ترجمان کرنل منصور الشکرۃ کا کہنا ہے کہ ریاض میں ٹریفک اژدہام کا مسئلہ حل کرنے کے لیے اسکولوں کے اوقات میں تبدیلی اور بعض اداروں کے لیے آن لائن ڈیوٹی نظام اپنانے پر غور کیا جا رہا ہے۔
کرنل منصور کا کہنا تھا کہ محکمہ ٹریفک ریاض میں اژدہام کے مسائل کے حل کے لیے خصوصی ورکشاپ کا انعقاد کرے گا۔
ورکشاپ ریاض کی شاہراہوں پر ٹریفک سلامتی کا معیار بلند کرنے، ٹریفک کو رواں دواں کرنے اور رکھنے کے حوالے سے سفارشات پیش کرے گا۔
محکمہ ٹریفک کے ترجمان کا کہنا ہے کہ ماہرین نے تجویز دی ہے کہ ٹریفک اژدہام کا مسئلہ حل کرنے کے لیے اسکولوں کے اوقات تبدیل کیے جائیں، کالجوں اور جامعات میں تعلیم کے نئے نظام الاوقات جاری ہو جبکہ بعض کمپنیوں و اداروں اور سرکاری محکموں کو اس امر کا پابند بنایا جائے کہ وہ آن لائن ڈیوٹی سسٹم رائج کریں۔
انہوں نے کہا کہ ریاض میٹرو پروجیکٹ کے تناظر میں شہر کی بعض شاہراہوں کی تنظیم نو ہونی چاہیئے۔
ترجمان کا کہنا تھا کہ ورکشاپ میں وزارت بلدیات و دیہی و آباد کاری امور، کنگ سعود یونیورسٹی، امام محمد بن سعود اسلامی یونیورسٹی، امیر نائف یونیورسٹی برائے علوم سلامتی اور ریاض ڈیولپمنٹ رائل اتھارٹی کے نمائندے شریک ہوں گے۔
