سمندر میں موجود ٹائی ٹینک کے ملبے کی طرف سفر کے دوران تباہ ہونے والی آبدوز ’ٹائٹن‘ کی تباہی کے وقت کی مبینہ خوفناک آڈیو امریکی سائنٹیفک ایجنسی نیشنل اوشینک اینڈ ایٹموس فیرک ایڈمنسٹریشن نے جاری کردی ہے۔
بین الاقوامی خبر رساں ادارے کی رپورٹ کے مطابق 20 سیکنڈ کی آڈیو میں کسی چیز کے پھٹنے کی آواز سنائی دیتی ہے اس کے بعد شور سنائی دیتا ہے۔
رپورٹس کے مطابق کہا جارہا ہے کہ یہ ٹائی ٹینک کے ملبے کی جانب سفر کے دوران تباہ آبدوز ٹائٹن کی تباہی کے وقت کی آوازیں ہیں۔
امریکی اخبار نیویارک پوسٹ کی رپورٹ کے مطابق اس ریکارڈنگ کو ایک مورڈ پیوسیو ایکوسٹک کے ذریعے حاصل کیا گیا جہاں سے تقریباً 900 میل دور اوشین گیٹ کی آبدوز پانی کے دباؤ میں پھنس کر تباہ ہوگئی تھی۔
امریکی کوسٹ گارڈ کا اس حوالے سے کہنا تھا کہ اس کلپ سے معلوم ہوتا ہے کہ یہ ٹائٹن کے آبدوز کے پھٹنے کی آواز کے اخراج کے صوتی اخراج کا مجموعہ ہے۔
واصح رہے کہ اوشین گیٹ Expeditions کی تیار کردہ یہ آبدوز گزشتہ سال18 جون کو بحر اوقیانوس میں ٹائی ٹینک کی جانب جاتے ہوئے سمندر میں تباہ ہوگئی تھی۔ بہت تلاش کے بعد بھی اس کا سراغ نہیں لگایا جاسکا تھا۔
خوفناک حادثے کے باعث ٹائٹن میں سوار کمپنی کے چیف ایگزیکٹو اسٹاکٹن رش، دو پاکستانی شہری شہزادہ داؤد اور ان کے بیٹے سلیمان داؤد سمیت ہیمش ہارڈنگ اور پال ہنری نارجیولیٹ لقمہ اجل بن گئے تھے۔
اس کا ملبہ کئی دن کی تلاش کے بعد ملا تھا، حکام کا کہنا تھا کہ اس بات کا قوی امکان ہے کہ آبدوز ٹائٹن لاپتا ہونے کے فوراً بعد ہی حادثے کا شکار ہوگئی تھی۔
