قاہرہ: مصر میں فرعونی دور کے دس ٹن مجسمے کی اسمگلنگ کی کوشش ناکام بنا دی گئی، مجسمہ نکالنے والے 3 افراد کو پولیس نے دھر لیا۔
عرب نیوز کے مطابق مصر کی سیکیورٹی سروسز نے ملک کے جنوب میں واقع اسوان ریجن میں نوادرات کی غیر قانونی کھدائی کرنے والے تین افراد کو حراست میں لے لیا ہے۔
محکمہ سیاحت اور نوادرات پولیس کو اطلاع ملی تھی کہ دریائے نیل کے کنارے تاریخی علاقے اسوان میں چند افراد آثار قدیمہ کی حدود میں کھدائی کر رہے ہیں۔
پولیس کا کہنا تھا کہ اس علاقے میں کھدائی کرنے والوں کا مقصد اسوان میں جنوبی کان کے علاقے الشلال آبشار میں فرعونی دور سے تعلق رکھنے والے گرینائٹ کے مجسمے چوری کرنا تھا۔
محکمے کے مطابق یہاں موجود مجسمے کے اردگرد غیر منظم قسم کی کھدائی کے نشانات پائے گئے، جس سے ظاہر ہو رہا تھا کہ ان افراد کا مجسمے کو سائٹ سے ہٹانے اور اسمگل کرنے کا منصوبہ تھا۔
