لاہور: نگران وزیر اعلیٰ محسن نقوی نے صوبہ پنجاب میں پانی چوری کے واقعات کی روک تھام کا حکم دے دیا۔
تفصیلات کے مطابق نگران وزیر اعلیٰ پنجاب محسن نقوی کی زیر صدارت اعلیٰ سطح کا اجلاس منعقد ہوا، اجلاس میں کپاس کی بوائی کے حوالے سے پیش رفت کا جائزہ لیا گیا، وزیر اعلیٰ نے کپاس کی بوائی اور پیداوار کا ٹارگٹ ہر صورت حاصل کرنے کی ہدایت کی۔
اجلاس میں کہا گیا کہ کپاس کی زیادہ پیداوار حاصل کرنے والے کاشت کاروں کو نقد انعامات دیے جائیں گے، کپاس کی بوائی کا ہدف حاصل کرنے پر متعلقہ عملے کی بھی حوصلہ افزائی کی جائے گی۔
وزیر اعلیٰ محسن نقوی نے کہا ’’کپاس کی بوائی کا ٹارگٹ حاصل کرنا ہے اور فصل کی دیکھ بھال بھی ضروری ہے۔‘‘
محسن نقوی نے کپاس کی فصل کے لیے درکار پانی کی فراہمی کی یقین دہانی کرائی، اجلاس میں فیصلہ کیا گیا کہ کاشتکاروں کو پانی، بیچ، کھاد سمیت کسی چیز کی کمی نہیں آنے دی جائے گی، انھوں نے صوبے میں جعلی ادویات اور جعلی بیچ فروخت کرنے والوں کے خلاف کارروائی مزید مؤثر بنانے کی بھی ہدایت کی۔
اجلاس میں سیٹیلائٹ کے ذریعے کراپ سروے کی تجویز بھی رکھی گئی، وزیر اعلیٰ نے کہا کپاس کی کم ازکم امدادی قیمت 8500 روپے مقرر کی گئی ہے، پنجاب میں کپاس کی بوائی کا ہدف حاصل کرنا ہمارا مشن ہے، فصل صوبے اور کاشتکار کے لیے معاشی گیم چینجر ثابت ہو سکتی ہے۔
