جاپان میں دن دہاڑے قیمتی گھڑیوں کے شو روم میں ڈکیتی کرنے والا مجرم پولیس کی گرفت میں آگیا۔ نوجوان کو لمبے عرصے کے لیے جیل کی ہوا کھانی پڑے گی۔
مئی میں وسطی ٹوکیو میں قیمتی گھڑیوں کی دکان کو لوٹ لیا گیا تھا، ٹوکیو کی ضلعی عدالت نے اس جرم میں ملوث ایک نوجوان کو چار سال چھ ماہ قید کی سزا سنائی ہے۔ 18 سالہ مذکورہ ملزم سمیت، نقاب پوش نوجوانوں کا ایک گروپ، گنزا کے علاقے میں ایک دکان میں گھسا اور 74 گھڑیاں اٹھا لے گیا۔
عدالت کو استغاثہ نے بتایا کہ نوجوانوں کے گروہ نے جو سامان لوٹا اس کی مالیت تقریباً 20 لاکھ ڈالرز کے قریب بنتی ہے۔
جج کا اپنے ریمارکس میں کہنا تھا کہ ڈکیتی بہت خطرناک اور بدنیتی پر مبنی جرم ہے، ایک مصروف علاقے میں دن دہاڑے شیشے کے شوکیس توڑنے کے لیے لوہے کے باراستعمال کیے گئے اور خوف پھیلایا گیا۔
تمام مسروقہ سامان برآمد کر لیا گیا ہے اور ملزم کا دکان کے عملے سے سمجھوتہ ہو گیا ہے تاہم اس کے اس کے باوجود جج کی جانب سے نوجوان کو سزا سنائی گئی ہے۔
جج کے مطابق معاملے کی حساسیت کے پیش نظر ملزم کے نابالغ ہونے کو مدنظر رکھتے ہوئے بھی اس کے لیے قید کی سزا ضروری ہے۔
