راولپنڈی : موٹر وے ٹول پلازہ پر تین روز قبل ہونے والی فائرنگ میں ملوث 6ملزمان کو گرفتار کرکے بھاری تعداد میں اسلحہ برآمد کرلیا گیا۔
اس حوالے سے سی سی پی او راولپنڈی سید خالد محمود کا کہنا ہے کہ ملزمان نے ٹول پلازہ پرٹول ٹیکس نہ دینے پر اصرار کیا تھا کس پر عملے اور ملزمان کے درمیان تلخ کلامی ہوئی۔
انہوں نے بتایا کہ ملزمان نے اسلحہ کے زور پر عملے کے ارکان کو سنگین نتائج کی دھمکیاں دیں اور براہ راست فائرنگ کی تھی، جس کے نتیجے میں 3افراد محمد ذیشان، عامر شہزاد اور عمر بلال زخمی ہوئے تھے۔
سی سی پی او کا کہنا ہے کہ گرفتار ملزمان کے قبصے سے2گاڑیاں،5 رائفل اور کافی تعداد میں گولیاں بھی برآمد ہوئی ہیں۔
اس کے علاوہ ملزمان کو گرفتاری سے بچنے کیلئے مدد دینے والے5سہولت کاروں کو بھی گرفتار کرلیا گیا ہے، ملزمان کیخلاف مقدمہ3روز قبل تھانہ نصیر آباد میں دہشت گردی، اقدام قتل و دیگر دفعات کے تحت درج کیا گیا تھا۔
واضح رہے کہ 26فروری کو موٹروے ٹول پلازہ پر فائرنگ سے چار اہل کارزخمی ہوگئے تھے، ذرائع کے مطابق واقعہ ہفتہ کی رات تھانہ نصیرآباد کی حدود میں پیش آیا۔
ٹول پلازے پر موجود ٹول وصول کرنے والے اہل کاروں نے لاہور کی جانب سے آنے والی ایک گاڑی کوروکنے کی کوشش کی تو کارسواروں نے فائرنگ کردی، ملزمان بیرئیر توڑ کر اپنی ایک گاڑی موقع پر چھوڑ کر فرار ہوگئے تھے۔
پولیس کا کہنا تھا کہ فائرنگ ملزم سید حسنین شاہ نے کی جو ایم ٹیگ کی سہولت استعمال کرنا چاہتا تھا، بیلنس زیرو ہونے پر ٹول ٹیکس کا مطالبہ کیا گیا جس پر ملزم نے فائرنگ کردی اور ٹول پلازہ بیرئیر کو توڑ کر فرار ہوا۔
قبل ازیں پولیس نے گاڑی کی رجسٹریشن سے گھر پر چھاپا مارا، جہاں سے ملزم فرار ہوگیا، پولیس نے مرکزی ملزم کے باپ سید امتیاز شاہ اور بھائی کو گرفتار کرلیا تھا، گھر کی تلاشی میں بھاری ہتھیار بھی برآمد کرلیے، پولیس نے دو گاڑیوں کو قبضے میں لے کر تھانہ مورگاہ منتقل کردیا۔ ملزمان معروف پولٹری بزنس کے مالکان ہیں
