اسلام آباد : ڈسٹرکٹ اینڈ سیشن کورٹ اسلام آباد میں توشہ خانہ کیس میں کوئی خاص پیشرفت نہ ہوسکی، عدالت نے سماعت 11 اپریل تک ملتوی کردی گئی۔
تفصیلات کے مطابق الیکشن کمیشن کی توشہ خانہ کیس کی جلد سماعت مقرر کرنے کی درخواست پر سماعت ہوئی، ایڈیشنل ڈسٹرکٹ اینڈ سیشن جج ظفراقبال نے کیس کی سماعت کی۔
الیکشن کمیشن کے وکیل امجد پرویزعدالت میں موجود تھے، اس موقع پر پولیس کی جانب سے عمران خان کو نوٹس کی تعمیل کی رپورٹ جمع نہیں کرائی جاسکی۔
پاکستان تحریک انصاف کے جونیئر وکیل عدالت میں پیش ہوئے انہوں نے عدالت کو بتایا کہ نہ ہمارے کسی سینئر وکیل اور نہ ہی عمران خان کو کوئی نوٹس ملا ہے۔
بعد ازاں ایڈیشنل ڈسٹرکٹ اینڈ سیشن جج ظفر اقبال نے توشہ خانہ کیس کی سماعت11اپریل تک ملتوی کردی۔
واضح رہے کہ اسلام آباد کی دو مختلف عدالتوں میں آج عمران خان کے خلاف مقدمات سماعت کے لیے مقرر تھے، الیکشن کمیشن کی جانب سے توشہ خانہ کیس کی جلد سماعت مقرر کرنے کی درخواست پر ایڈیشنل سیشن جج ظفر اقبال کی عدالت میں دلائل طلب کیے گئے تھے۔
توشہ خانہ کیس کی آئندہ سماعت 29 اپریل مقرر ہے لیکن الیکشن کمیشن نے عدالتی کارروائی میں تاخیر کا شکار ہونے کے باعث سماعت جلد مقرر کرنے کی درخواست دائر کر رکھی ہے۔
دوسری جانب عمران خان اور ان کی اہلیہ بشریٰ بی بی کے خلاف غیرقانونی نکاح کے الزام پر کیس کی سماعت بھی آج ہوگی۔
