لاہور : مشیر داخلہ واطلاعات پنجاب عمر سرفراز چیمہ نے کہا ہے کہ عدالت نے توشہ خانہ کا ریکارڈ مانگا تو شہباز شریف اور زرداری حکومت کو لینے کے دینے پڑگئے۔
یہ بات انہوں نے میڈیا سے گفتگو کرتے ہوئے کہی، انہوں نے کہا کہ پی ڈی ایم ٹولہ کی توشہ خانہ کے معاملے پر ٹائیں ٹائیں فش کیوں ہوگئی ہے؟
مشیر داخلہ و اطلاعات پنجاب کا کہنا تھا کہ دن رات توشہ خانہ کی رٹ لگانے والوں کو اب توشہ خانہ کی یاد کیوں نہیں ستا رہی؟ اپنے لیڈروں کی چوری پکڑے جانے کے خوف سے ان کے ایم این اے نے کیس ہی واپس لے لیا۔
عمر سرفراز چیمہ نے کہا کہ دوسروں پر جھوٹے الزام لگانے والوں نے خود کتنے تحائف لئے، یہ لوگ کیسے غیرقانونی طور پر قیمتی گاڑیاں اور نوادرات لے اڑے، سب تفصیلات قوم کو پتہ چلنی چاہیئں۔
صوبائی مشیر داخلہ نے کہا کہ ریکارڈ سے ثابت ہے کہ ن لیگ، پیپلزپارٹی کی حکومتوں نے توشہ خانہ کے ساتھ کھلواڑ کیا، نواز، زرداری توشہ خانہ سے قیمتی اشیاء کوڑیوں کے مول لے کر گئے۔
ان کا کہنا تھا کہ توشہ خانہ کا ریکارڈ ن لیگ ،پیپلزپارٹی کی لوٹ مار کا منہ بولتا ثبوت ہے، عمر سرفراز چیمہ کے مطابق یہ ثابت ہوچکا ہے کہ عمران خان نے توشہ خانہ سے قانون کے مطابق گھڑی لی۔
انہوں نے مزید کہا کہ باقی حکومتوں نے توشہ خانہ کو مال مفت دل بے رحم کی طرح لوٹا، عمران خان پی ڈی ایم کے توشہ خانہ کے پروپیگنڈا سے بھی صادق اور امین ہوکر نکلے، پی ڈی ایم حکومت نے توشہ خانہ سے لوٹ مار نہیں کی تو ریکارڈ جمع کرائے۔
