اسلام آباد : بانی پی ٹی آئی کی اہلیہ بشریٰ بی بی نے توشہ خانہ ریفرنس میں سزا کیخلاف اسلام آباد ہائی کورٹ سے رجوع کرلیا۔
تفصیلات کے مطابق بانی پی ٹی آئی کی اہلیہ بشریٰ بی بی نےتوشہ خانہ ریفرنس میں سزا کیخلاف اپیل دائرکردی ، بیرسٹر سلمان صفدر کےذریعے اسلام آباد ہائیکورٹ میں اپیل دائر کی گئی۔
بشریٰ بی بی کی جانب سےدائراپیل میں اسٹیٹ اورنیب کو فریق بنایا گیا اور مؤقف اختیار کیا کہ نیب نےتعصب پر مبنی تفتیش کی ،بدنیتی پر مبنی جعلی ریفرنس دائر کیا ہے۔
اپیل میں کہا گیا کہ نیب نے سیاسی مخالفین کی ہدایت پر جھوٹااور جعلی ریفرنس دائر کیا جبکہ فرد جرم بھی درست انداز میں قانونی تقاضوں کے مطابق عائد نہیں کی گئی۔
بشریٰ بی بی نے استدعا کی احتساب عدالت کا31 جنوری کا فیصلہ کالعدم قرار دینے کی استدعا کی۔
خیال رہے احتساب عدالت توشہ خانہ کیس میں بانی پی ٹی آئی اور ان کی اہلیہ بشریٰ بی بی کو 14 سال قید بامشقت اور787 ملین جرمانےکی سزاسنائی تھی۔
