فوجیان : چین میں سیاحوں کیلئے نہایت حیرت انگیز اور دلچسپ تفریحی سرگرمی متعارف کرائی گئی ہے جس میں وہ اپنے پسندیدہ لباس میں ہواؤں میں اڑتے ہوئے لطف انداز ہوسکتے ہیں۔
چین میں سیاحوں کی توجہ کیلئے نیا انداز متعارف کرایا گیا ہے، جس میں وہ پانی پر چلنے سے لے کر دریا کے پار اڑنے تک کا مزہ لے سکتے ہیں اس دوران انہیں ان کا پسندیدہ لباس بھی مہیا کیا جاتا ہے۔
صوبہ فوجیان کے ایک مشہور سیاحتی مقام پر آنے والے لوگ روایتی لباس زیب تن کرتے ہیں اور خود کو کسی بھی فلمی یا کنگ فو کردار میں بدل سکتے ہیں جسے وہ پسند کرتے ہیں اور اس تجربے سے لطف اندوز ہوسکتے ہیں۔
In this kung fu world, visitors can turn their dreams into reality by flying across a river, dressed in traditional costumes. pic.twitter.com/SdU0Xam0sp
— SCMP News (@SCMPNews) July 5, 2021
اس مقام کی ایک ویڈیو کو ساؤتھ چائنا مارننگ پوسٹ نے شیئر کیا جو دیکھتے ہی دیکھتے سوشل میڈیا پر وائرل ہوگئی اس ویڈیو میں لوگوں کو ہوا میں اڑتے اور فلموں میں کیے جانے والے اسٹنٹ کی کوشش کرتے دکھایا گیا ہے۔
اس کا طریقہ کار یہ ہے کہ سیاحوں کو مضبوط تاروں کے ساتھ ان کی کمر سے منسلک کرکے ہوا میں معلق کیا جاتا ہے اور پھر کبھی پانی پر چلنے تو کبھی ہواؤں میں اوپر اٹھا لیا جاتا ہے۔
اس اسٹنٹ کا معاوضہ 128 یو آن یعنی 20ڈالر رکھا گیا ہے جس میں پسندیدہ لباس میک اپ اور ہتھیار شامل ہیں جنہیں سیاح کسی فلمی انداز میں استعمال کرکے محظوظ ہوتے ہیں۔
ایک نیوز ویب سائٹ کے مطابق ان تاروں کی لمبائی600 میٹر ہوتی ہے اور سیاح کو زمین سے 20 میٹر اوپر رکھا جاتا ہے اور پھر خود کار سسٹم کے تحت اسے اوپر اور نیچے کیا جاسکتا ہے۔
اس کے علاوہ سیاح اپنے ساتھ آسمان میں اڑتے ہوئے تلوار نما ہتھیار بھی لہرا سکتے ہیں، آن لائن شیئر کیے جانے کے بعد صارفین نے اس ویڈیو کو بے حد پسند کیا اور بہت سے لوگ اس اڑنے والے تجربے کو آزمانے کے خواہاں ہیں۔