نئی دہلی: بھارت میں ایک جاپانی سیاح محبت کی یادگار تاج محل کی سیاحت کے دوران دورہ قلب کے سبب انتقال کرگیا۔
آگرہ کے ٹورسٹ پولیس اسٹیشن کے انچارج کے مطابق 66 سالہ جاپانی سیاح اپنے تین ساتھیوں اورمقامی گائیڈ کے ہمراہ عظیم تاج کے دورے پر تھا کہ سیڑھیاں چڑھتے ہوئے گرگیا۔
پولیس کے مطابق سیاح کا نام ’’ہیدیتو اویدا‘‘ بتایا گیا ہے، اسے اسپتال لے جایا گیا لیکن وہ دورے کی شدت سے جانبر نہ ہوسکا۔
پوسٹ مارٹم کی رپورٹ سے تصدیق ہوئی ہے کہ سیاح کو دل کا دورہ پڑا تھا، پولیس کے مطابق جاپانی سفارت خانے کو اس سانحے کی اطلاع دے دی گئی ہے۔
برطانوی خبررساں ادارے کے مطابق ایک عینی شاہد ساگرسنگھ کا کاکہنا ہےکہ جاپانی سیاح تاج محل کے شاہی دروازے کے نزدیک سیلفی لے رہا تھا کہ یکدم فرش پرگرگیا۔
بھارت کے قرونِ وسطیٰ کی عظمت کی شاندار یادگارتاج محل مغل شہنشاہ شاہجہاں نے اپنی چہیتی ملکہ ممتازمحل کی یاد میں 1631ء میں تعمیر کروایا تھا، جہاں روزانہ 12 ہزار سے زائد ملکی اورغیرملکی سیاح محبت کی اس لازوال یادگارکو خراجِ تحسین پیش کرنے آتے ہیں۔
