چین کے صوبے سنکیانگ میں واقع صحرائے کومتاغ میں گائیڈ اور سیاحوں کے ایک گروپ کو انوکھے تجربے کا سامنا کرنا پڑ گیا۔
ایک ویڈیو کلپ سوشل میڈیا پر وائرل ہورہی ہے جس میں سیاحوں کے ایک گروپ کو صحرا میں سفر کرتے ہوئے دکھایا گیا ہے جس میں اچانک ان کے بال ہیج ہاگس کی طرح کھڑے ہوجاتے ہیں۔
ویڈیو میں دیکھا جاسکتا ہے کہ جیسے ہی سیاحونں کا یہ گروپ صحرائی ٹیلے کے اوپر پہنچا تو ان کے بال کھڑے ہوگئے اور سنسناہٹ جیسی آواز گونجنے لگی۔
جس کے باعث یہ افراد ٹیلے پر چار سے پانچ منٹ ہی گزار سکے اور پھر نیچے اتر گئے۔
اس حوالے سے سائنسدانوں کا کہنا ہے کہ ایسا اس لیے ہوا کیونکہ سیاحوں کے سر پر ایسے بادل موجود تھے جن میں برقی رو موجود تھی۔
ایسے بادلوں میں پانی کے بخارات، برف کے کرسٹلز اور دیگر عناصر سے ماحول میں برقی رو دوڑ جاتی ہے جس سے بال اوپر کی جانب کھڑے ہو جاتے ہیں۔
