واشنگٹن: جاپان کی ٹویوٹا نے امریکی جنرل موٹرز کو اس کے منصب سے محروم کر دیا ہے۔
تفصیلات کے مطابق جاپان کی ملٹی نیشنل آٹوموٹیو مینوفیکچرر ٹویوٹا موٹر کارپوریشن نے امریکی کمپنی جنرل موٹر کو سالانہ فروخت میں پیچھے چھوڑ دیا ہے۔
رپورٹس کے مطابق امریکا میں ٹویوٹا کی فروخت پہلی بار جی ایم سے بڑھ گئی ہے، جاپانی کمپنی نے عالمی وبا کے باعث فراہمی میں آنے والی رکاوٹوں کے اثرات کو کم سے کم رکھنے میں کامیابی کے باعث یہ پوزیشن حاصل کی ہے۔
ٹویوٹا موٹر نارتھ امریکا کے عہدے داران نے بتایا کہ کمپنی نے 2021 میں 23 لاکھ 30 ہزار سے زائد نئی گاڑیاں فروخت کیں، جب کہ امریکا کی سب سے بڑی آٹوموٹیو کمپنی جی ایم نے اسی عرصے کے دوران تقریباً 22 لاکھ 10 ہزار گاڑیاں فروخت کیں۔
1931 کے بعد یہ پہلا موقع ہے کہ جی ایم، امریکا میں گاڑیوں کی فروخت میں پہلے نمبر پر نہیں رہی، جی ایم کے اعداد و شمار ظاہر کرتے ہیں کہ اس کی فروخت میں ایک سال قبل کے مقابلے میں 12.9 فی صد کمی ہوئی ہے۔
اس کی وجوہ میں سیمی کنڈکٹرز کی عالمی قلت بھی شامل ہے جس کے باعث کمپنی کو شمالی امریکا میں اپنی پیداوار معطل کرنی پڑی تھی، تاہم ٹویوٹا کو بھی اپنی پیداوار کم کرنی پڑی تھی، لیکن یہ کمی محدود نوعیت کی تھی۔
دوسری طرف امریکا میں ٹویوٹا کے ہائبرڈ ماڈلز کی فروخت میں بھی اضافہ ہوا ہے۔
