جاپان کی ملٹی نیشنل آٹوموٹیو مینوفیکچرر ٹویوٹا مسلسل دوسرے سال بھی گاڑیوں کی فروخت کے حوالے سے نمبر وَن کمپنی رہی۔
جاپان کی گاڑی ساز بڑی کمپنی ٹویوٹا نے مسلسل دوسرے سال بھی دنیا بھر میں فروخت کے حوالے سے اپنا اعزاز برقرار رکھا ہے، گاڑیوں کی فروخت کے لحاظ سے 2021 میں بھی ٹویوٹا دنیا کی پہلے نمبر کی گاڑی ساز کمپنی رہی۔
کمپنی نے ایک بیان میں کہا کہ اس کے عالمی گروپ نے جنوری سے نومبر تک 95 لاکھ سے زائد گاڑیاں فروخت کیں، ان میں ٹویوٹا کی ذیلی کمپنیوں دائی ہاتسُو اور ہینو کی گاڑیوں کی فروخت بھی شامل ہے۔
دوسری طرف ٹویوٹا کی قریبی حریف کمپنی، جرمنی کی فاکس ویگن کا کہنا ہے کہ اس کے گروپ نے پورے سال جو گاڑیاں فروخت کی ہیں، ان کی تعداد تقریباً 89 لاکھ ہے۔
امریکا: ٹویوٹا نے جنرل موٹرز کو پریشان کر دیا
یاد رہے کہ کرونا وائرس کی وبا کے باعث پیدا ہونے والی پرزوں کی قلت کے سبب ٹویوٹا کمپنی کو موسم گرما سے خزاں تک اپنی پیداوار میں کمی کرنی پڑی تھی۔
تاہم پرزوں کی فراہمی میں خلل کے اثرات سے دیگر گاڑی ساز اداروں کے مقابلے میں ٹویوٹا بہتر انداز سے نمٹنے میں کامیاب رہی تھی، حتیٰ کہ اس کی گاڑیوں کی چین اور امریکا میں فروخت میں بھی اضافہ ہوا۔
