ریاض: ترکی نے سعودی عرب کے ساتھ تجارتی تعلقات کی اہمیت کو تسلیم کرتے ہوئے مملکت کے ساتھ تجارتی روابط مزید بڑھانے پر زور دیا ہے۔
غیرملکی خبررساں ادارے کے مطابق گزشتہ روز سعودی عرب کے وزیر تجارت ڈاکٹر ماجد القصبی نے استنبول میں اپنی سعودی ہم منصب روشار بیکان سے ملاقات کی جس میں دونوں ملکوں کے درمیان تجارتی روابط بڑھانے پر زور دیا گیا۔
یہ ملاقات اسلامی تعاون تنظیم کی اقتصادی و تجارتی ترقی کمیٹی کومسیک کے 34 ویں اجلاس کے موقع پر ہوئی، ترک خاتون وزیر تجارت نے کہا کہ سعودی عرب کے ساتھ تجارتی روابط ترکی کے لیے انتہائی اہمیت کے حامل ہیں اور انقرہ سعودیہ کی تجارتی اہمیت کو نظر انداز نہیں کرسکتا۔
انہوں نے کہا کہ ترکی نے اپنے ملک میں سعودی سرمایہ کاروں کے لیے مواقع پیدا کیے ہیں، انہیں ان مواقعوں سے فائدہ اُٹھانا چاہئے، بیکان کا کہنا تھا کہ ترکی میں سعودی تاجر برادری کے لیے پرکشش ماحول موجود ہے اور ہم سرمایہ کاری کی راہ میں حائل رکاوٹیں دور کرنے کی کوشش کررہے ہیں۔
اس موقع پر سعودی وزیر تجارت القصبی نے کہا کہ سعودی عرب ترکی کے ساتھ تجارت سمیت تمام شعبوں میں تعاون کا خواہاں ہے، ترکی اور سعودی عرب کے اسپیشل سیکٹر کے اداروں کے مشترکہ اجلاس ہونے چاہئیں تاکہ دونوں ملکوں میں ایک دوسرے کی سرمایہ کاری سے فائدہ اُٹھایا جاسکے۔
واضح رہے کہ کومسیک کمیٹی کا تین روزہ اجلاس 26 نومبر کو استنبول میں شروع ہوا تھا، اجلاس کے افتتاحی سیشن سے ترک صدر رجب طیب اردوان نے خطاب کیا تھا۔
ترک صدر نے عالم اسلام کو درپیش معاشی اور تجارتی مشکلات پر روشنی ڈالی اور مسلمان ملکوں کے درمیان تجارتی روابط کو مزید فروغ دینے کی ضرورت پر زور دیا۔
