کراچی: جناح اسپتال کراچی کی ایک لیڈی ڈاکٹر کا بھی مزار قائد کے قریب ڈبل سواری پر چالان کٹ گیا۔
اے آر وائی نیوز کے مطابق جناح اسپتال کراچی کے لیے ڈیوٹی پر جانے والی لیڈی ڈاکٹر کو ڈبل سواری پر مزار قائد کے قریب روک کر ٹریفک اہل کار نے ای چالان کاٹ دیا۔
خاتون ڈاکٹر ڈیوٹی کے لیے بھائی کے ساتھ موٹر سائیکل پر اسپتال جا رہی تھیں، لیڈی ڈاکٹر کا کہنا تھا کہ انھیں ایمرجنسی ڈیوٹی پر جانا تھا، ٹرانسپورٹ بند ہونے کی وجہ سے وہ بھائی کے ساتھ موٹر سائیکل پر نکلیں۔
لیڈی ڈاکٹر کا کہنا تھا کہ انھوں نے ڈیوٹی پر موجود پولیس عملے کو بہت سمجھایا تاہم انھوں نے کوئی عذر تسلیم نہیں کیا، عملے کا کہنا تھا کہ آپ کسی بھی طریقے سے جائیں لیکن ڈبل سواری کی اجازت نہیں ہے۔
کراچی: ڈبل سواری کی پابندی سے استثنیٰ ختم، صحافی اور پولیس اہل کار بھی پابند ہوں گے
ڈبل سواری پر جناح اسپتال کی لیڈی ڈاکٹر کا 520 روپے کا ای چالان کاٹا گیا، لیڈی ڈاکٹر کا کہنا تھا کہ انھوں نے چالان جمع کرا دیا ہے، چالان جمع کرانے کے بعد انھیں ڈبل سواری کی اجازت دے دی گئی۔
یاد رہے کہ کراچی میں لاک ڈاؤن کے دوران ڈبل سواری پر پابندی عاید ہے، حکومت سندھ نے صحافیوں اور پولیس اہل کاروں کو ڈبل سواری سے حاصل استثنیٰ بھی ختم کر دیا ہے۔
