کراچی: ڈپٹی انسپکٹر جنرل ٹریفک پولیس کراچی احمد نواز کی زیر صدارت اجلاس میں ون وے کی خلاف ورزی کرنے والوں کو روکنے کے لیے ٹریفک پولیس کو نئے احکامات جاری کیے گئے ہیں۔
اجلاس میں ڈی آئی جی ٹریفک کراچی احمد نواز نے ٹریفک ایشوز پر بات چیت کی، اور کہا کہ ون وے کی خلاف ورزی ٹریفک کے لیے سنگین مسئلہ بنا ہوا ہے، لوگوں نے ٹریفک قوانین کی خلاف ورزی روز کا معمول بنا رکھا ہے۔
انھوں نے ہدایت کی کہ ٹریفک قوانین کی خلاف ورزی کرنے والوں کو جرمانے عائد کیے جائیں، اور جرمانہ جمع نہ کرانے کی صورت میں گاڑیاں ضبط کی جائیں، ہمارا فوکس چالان کرنا نہیں بلکہ ٹریفک کو مینٹین کرنا ہے، اس لیے قوانین کی خلاف ورزی کی صورت میں چالان ضرور ہوگا۔
ڈی آئی جی ٹریفک نے ہدایت کی کہ ایک سے زائد خلاف ورزیاں صرف ایک ہی چالان میں دی جائیں، انفورسمنٹ آفیسرز سگنل کے بعد کھڑے ہوں گے، باڈی وورن کیمرے سے خلاف ورزیوں کی ویڈیو بنا کر اپنے پاس محفوظ رکھیں گے، اور خلاف ورزی کرنے والوں کو ویڈیو کے تحت جرمانے عائد کریں گے۔
احمد نواز نے کہا کہ 30 فی صد نفری کو دن اور 70 فی صد کو رات میں مارکیٹوں کے اطراف لگائیں، اضافی نفری کو مؤثر جگہوں پر تعینات کریں، کورنگی روڈ، سن سیٹ بلیوارڈ، مائی کولاچی روڈ پر رات میں ٹریفک دباؤ ہوتا ہے، اس لیے وہاں روانی یقینی بنائیں۔
انھوں نے ہدایت کی کہ ٹرانسپورٹ یونین ڈرائیورز کو ہدایت دیں کہ فاسٹ لین کی پابندی یقینی بنائیں، اس حوالے سے سڑکوں پر بینر بھی آویزاں کیے جائیں، پٹرولنگ کار، موٹر سائیکل پٹرولنگ افسران میگا فون کے ذریعے لوگوں کو آگاہ کریں کہ ہیوی گاڑیاں فاسٹ لین میں چلنے سے گریز کریں۔
ڈی آئی جی ٹریفک نے مزید ہدایات دیں کہ موٹر سائیکلوں اور گاڑیوں کو صرف سنگل لائن میں پارک کرائیں، رکشوں کے لیے سائیڈ پر مخصوص جگہ مقرر کریں بیچ سڑک میں کھڑا نہ ہونے دیں، جہاں چارج پارکنگ ہے اس جگہ کو لمیٹڈ کریں، ایس ایس پیز مارکیٹوں اور بازاروں کا خود دورہ کر کے صورت حال کا جائزہ لیں۔
