لاہور: فلم کی شوٹنگ کے لیے تھائی لینڈ جانے والی پاکستانی فن کاروں کی ٹیم کرونا وائرس کی وجہ سے پیدا ہونے والی صورت حال کے باعث تھائی لینڈ میں پھنس گئی ہے، جنھیں وطن واپس لانے کے لیے وزیر توانائی پنجاب متحرک ہو گئے۔
اے آر وائی نیوز کے مطابق وزیر توانائی پنجاب اختر ملک تھائی لینڈ میں پھنسے پاکستانی فن کاروں کی واپسی کے لیے متحرک ہو گئے ہیں، ڈاکٹر اختر ملک نے اس سلسلے میں وزیر خارجہ شاہ محمود قریشی سے رابطہ کر کے انھیں معاملے سے آگاہ کیا۔
اختر ملک کا کہنا تھا کہ وزیر خارجہ نے فن کاروں کی جلد وطن واپسی کی یقین دہانی کرائی ہے، پاکستانی سفارت خانہ فن کاروں کے ساتھ مسلسل رابطے میں ہے، ہمارے آرٹسٹ ملک کا سرمایہ ہیں، وہ جلد گھروں کو لوٹ آئیں گے۔
خیال رہے کہ یہ فن کار گزشتہ ماہ فلم عشرت میڈ اِن چائنا کی شوٹنگ کے لیے تھائی لینڈ گئے تھے، بتایا جا رہا ہے کہ تقریباً 21 کریو ممبرز تھائی لینڈ کے ایک مقامی ہوٹل میں پھنسے ہیں، ان فن کاروں میں شمعون عباسی، سارہ لورین، صنم سعید اور ڈائریکٹر محب مرزا بھی شامل ہیں۔
اداکار شمعون عباسی نے اس سلسلے تھائی لینڈ سے ایک ویڈیو پیغام بھی جاری کیا جس میں انھوں نے حکومت پاکستان سے اپیل کہ ان کی وطن واپسی کے سلسلے میں اقدامات کیے جائیں، شمعون کا کہنا تھا کہ وہ کریو کے ساتھ اس وقت تھائی لینڈ پہنچے تھے جب کرونا وائرس کی وبا کو عالمی وبا قرار نہیں دیا گیا تھا۔
خیال رہے کہ تھائی لینڈ میں کرونا وائرس کی وبا اس طرح نہیں پھیلی جس طرح یورپ اور امریکا میں اس نے تباہی مچائی ہے، اب تک تھائی لینڈ میں کرونا وائرس کے 1,978 کیسز سامنے آ چکے ہیں جب کہ وائرس سے ہونے والی اموات کی تعداد 19 ہے۔
