آپ نے کھانے بنانے کے حوالے بہت ویڈیوز دیکھ رکھی ہوں گی جن میں مزیدار پکوان تیار کرنے کی ترکیبیں سکھائی جاتی ہیں۔
بہت سی خواتین اپنی تیارہ کردہ اسپیشل ڈشز کی ویڈیوز بھی سوشل میڈیا پر پوسٹ کرتی ہیں جو کافی مقبول ہورہی ہیں، ان ویڈیو کا بنیادی مقصد لائیکس اور ویوز حاصل کرنا ہوتا ہے۔
لیکن یہ ویڈیو جو ہم آپ کے سامنے پیش کررہے ہیں اس کی خاص اور حیران کن بات یہ ہے کہ ایک خاتون نے آتش فشاں پہاڑ پر پیزا پکانے کا انتہائی منفرد طریقہ اپنایا ہے۔
ویڈیو میں دیکھا جاسکتا ہے کہ ایک خاتون سیاح نے وسطی امریکا کے ملک گوئٹے مالا کا دورہ کیا اور وہاں ایک آتش فشاں پہاڑ پر جاکر اپنے لیے پیزا تیار کیا۔
ایک دہکتے ہوئے آتش فشاں پر پیزا پکا کر کھانے والی خاتون کی اس ویڈیو نے انٹرنیٹ صارفین کو حیرت زدہ کردیا ہے۔
الیگزینڈرا بلوجٹ نامی خاتون نے انسٹاگرام پر ایک ویڈیو شیئر کی جس میں ایک شخص طشتری میں موجود پیزا پر سبزیاں ڈال رہا ہے اور کچھ لمحوں بعد وہ شخص پیزے کی طشتری کو پہاڑ کی سطح پر رکھ دیتا ہے۔
اس پہاڑ کے اندر آتش فشاں ہے جس کی حدت کی وجہ سے اس کی سطح پر رکھے گئے برتن میں پیزا پک گیا اور آگ جلانے کی ضرورت بھی نہیں پڑی۔
واضح رہے کہ گوئٹے مالا کے ایک فعال آتش فشاں پہاڑ پرکچھ مقامی لوگوں نے پہاڑ کی حدت سے پیزا پکا کرفروخت کرنے کا آغاز کیا ہے اس منفرد انداز سے پیزا پکانے کا یہ عمل سوشل میڈیا پر خوب وائرل ہورہا ہے اور بہت سے افراد اور یوٹیوبر نے محض اس پیزا سے لطف اندوز ہونے کے لیے گوئٹے مالا کا سفر اختیار کیا ہے۔
