واشنگٹن : امریکہ کے سابق صدر ڈونلڈ ٹرمپ نے ایک پھر اس عزم کا اظہار کیا ہے کہ وہ آئندہ انتخابات میں جوبائیڈن کو شکست دے کر دوبارہ ملک کی باگ دوڑ سنبھالیں گے۔
یہ بات انہوں نے عہدہ صدارت سے سبکدوش ہونے کے بعد پہلی بار ایک عوامی جلسے سے خطاب کرتےہوئے کہی، اپنے خطاب میں انہوں نے اس بات کا اشارہ دیا کہ وہ آئندہ بھی انتخابات لڑسکتے ہیں۔
سابق امریکی صدر ڈونلڈ ٹرمپ اتوار کی شام کو اورلینڈو میں ہونے والی کنزرویٹیو پولیٹیکل ایکشن کی ایک کانفرنس میں شریک ہوئے، بیس جنوری کو جو بائیڈن کی حلف برداری تقریب سے عین قبل وہائٹ ہاؤس کو خیر باد کہنے والے ٹرمپ کا یہ پہلا عوامی جلسہ تھا۔
غیر ملکی خبر رساں ادارے کے مطابق اس موقع پر ٹرمپ نے سامعین کو مخاطب کرتے ہوئے کہا کہ وہ نئی سیاسی جماعت تشکیل دینے کا کوئی منصوبہ نہیں رکھتے ہیں یہ اس لیے ضروری نہیں کیونکہ ان کے پاس پہلے ہی سے ریپبلکن جماعت موجود ہے۔
خطاب کے دوران ٹرمپ نے بیشتر وقت جو بائیڈن کی انتظامیہ اور ڈیموکریٹک پارٹی پر ان کی ناکامیوں کے لیے نکتہ چینی کرنے پر صرف کیا جس نے ابھی حال ہی میں اقتدار کو سنبھالا ہے۔
انہوں نے 2024 کے صدارتی انتخابات لڑنے کی طرف اشارہ کرتے ہوئے اپنے پرجوش حامیوں سے کہا کہ میں انہیں تیسری بار شکست دینے کا فیصلہ کر سکتا ہوں۔’
ان کا تیسری بار کا اشارہ اس جانب تھا کہ 2016 میں انہوں نے ڈیموکریٹس کو شکست دی تھی جبکہ نومبر 2020کے انتخابات کے بارے میں ان کا اب بھی یہی جھوٹا دعویٰ ہے کہ وہی کامیاب ہوئے تھے۔
