واشنگٹن: نو منتخب امریکی صدر ڈونلڈ ٹرمپ نے قومی انٹیلی جنس کے سابق ڈائریکٹر جان ریٹکلف کو سینٹرل انٹیلی جنس ایجنسی (سی آئی اے) کا ڈائریکٹر نامزد کردیا۔
بین الاقوامی خبر رساں ادارے کی رپورٹ کے مطابق آئندہ برس 20 جنوری کو صدارت کا عہدہ سنبھالنے سے قبل ٹرمپ اگلے گیارہ ہفتے کے دوران اپنی حکومت کے اہم عہدوں پر نامزگیوں میں مصروف ہیں۔
نو منتخب امریکی صدر کا اپنے بیان میں کہنا تھا کہ نیشنل انٹیلی جنس کے سابق ڈائریکٹر جان ریٹکلف سی آئی اے ڈائریکٹر کے طور پر کام کریں گے۔
ریٹکلف ٹرمپ کے پہلے دور حکومت میں قومی انٹیلی جنس کے ڈائریکٹر کے طور پر خدمات بھی سر انجام دے چکے ہیں۔
اس سے قبل نومنتخب صدر نے پیٹ ہیگزے کوامریکی وزیردفاع نامزد کردیا، ٹرمپ کا اس حوالے سے کہنا تھا کہ فخر ہے پیٹ کو اپنی کابینہ میں وزیردفاع کے طور پرکام کرنے کیلئے نامزدکیا۔
اُنہوں نے کہا کہ پیٹ نے اپنی زندگی فوجیوں اور ملک کیلئے ایک جنگجوکے طور پر گزاری ہے، ہماری فوج دوبارہ عظیم ہوگی اور امریکا کبھی پیچھے نہیں ہٹے گا، واضح رہے کہ پیٹ فاکس نیوز کے ایک شوکی میزبانی بھی کرچکے ہیں۔
واضح رہے کہ ٹرمپ نے مائیک ہکابی کو اسرائیل میں امریکا کا نیا سفیر نامزد کر دیا ہے، ان کی نامزدگی کے حوالے سے ٹرمپ نے کہا کہ خوشی ہو رہی ہے ارکنساس کے سابق گورنر مائیک ہکابی کو اسرائیل میں سفیر نامزد کر رہا ہوں۔
ڈونلڈٹرمپ کا اسرائیل میں نیا سفیر کون؟
انہوں نے کہا کہ مائیک کئی سالوں سے عظیم سرکاری ملازم، گورنر، اور لیڈران فیتھ رہا ہے مائیک اسرائیل اور اسرائیل کے لوگوں سے محبت کرتا ہے اور اسرائیل کے لوگ بھی مائیک سے محبت کرتے ہیں۔
