واشنگٹن: سابق امریکی صدر ڈونلڈ ٹرمپ نے ذاتی ویب سائٹ پر اپنے پیغامات جاری کرنا شروع کر دیے ہیں۔
تفصیلات کے مطابق ڈونلڈ ٹرمپ پر سوشل میڈیا پر پابندی برقرار رکھے جانے کے بعد وہ اپنی ذاتی ویب سائٹ پر پیغامات جاری کرنے لگے ہیں۔
ادھر امریکا میں ٹرمپ پر سوشل میڈیا کی پابندی برقرار رکھے جانے کے فیصلے پر نئی بحث شروع ہو گئی ہے، ری پبلکن سینیٹرز نے سابق امریکی صدر پر پابندی کو بد تر فیصلہ قرار دے دیا۔
خیال رہے کہ گزشتہ روز فیس بک، ٹویٹر اور انسٹاگرام نے سابق صدر پر پابندی کا فیصلہ برقرار رکھا، پابندی کا فیصلہ فیس بک کے تشکیل کردہ بورڈ ارکان نے کیا، ٹرمپ پر پابندی 6 جنوری کو حامیوں کی جانب سے کانگریس پر حملے کے بعد لگائی گئی تھی، فیس بک بورڈ کا کہنا تھا کہ سابق صدر نے اپنی پوسٹس سے حامیوں کو تشدد پر اکسایا، اور تشدد کا ممکنہ ماحول تشکیل دیا۔
فیس بک بورڈ میں صحافی، وکلا، سیاست دان، اور مختلف تنظیموں کے کارکنا ن شامل تھے، فیس بک، انسٹاگرام پر ٹرمپ کی پابندی ختم کرنے کا جائزہ آئندہ 6 ماہ میں لیا جائے گا۔
دوسری طرف ٹرمپ نے اپنے اوپر سماجی رابطوں کی ویب سائٹس کی پابندی پر شدید تنقید کی، انھوں نے اپنے بیان میں فیس بک، گوگل، ٹویٹر کو کرپٹ قرار دے دیا، ٹرمپ نے ذاتی سماجی رابطے کی ویب سائٹ شروع کرنے کا بھی اعلان کر دیا تھا۔
ذاتی ویب سائٹ پر جاری پیغامات ان کے چاہنے والے سماجی ویب سائٹس پر شیئر کرنے لگے ہیں، ٹرمپ ذاتی سماجی رابطوں کے پلیٹ فارم کا بھی جلد اعلان کرنے کا ارادہ رکھتے ہیں۔
