واشنگٹن : ٹرمپ انتظامیہ نے سفری پابندیوں کا شکار چھ مسلمان ملکوں کے شہریوں کے لئے ویزا کی نئی شرائط جاری کردیں۔
امریکا میں داخلے کی پابندی کا شکار چھ مسلمان ملکوں کے لئے ٹرمپ انتظامیہ نے نئی شرائط جاری کردیں، ویزا پابندی کا سامنا کرتے چھ ملکوں کے وہ شہری جن کے قریبی رشتے دارامریکا میں رہائش پذیرہیں ویزا درخواست دے سکتے ہیں۔
امریکا میں کاروبار کرنے والے بھی ویزا کے لئے اہل ہوں گے۔
امریکی صدرڈونلڈ ٹرمپ نے سفری پابندیاں بحال ہونے کے فیصلے کوامریکی عوام کے مفاد میں قراردیا۔
اس سے قبل امریکی سپریم کورٹ نے مسلمان ملکوں پر سفری پابندیوں کا صدر ٹرمپ کا حکم نامہ جزوی طور پر بحال کردیا تھا اور ساتھ ہی سپریم کورٹ کی طرف سے یہ بھی کہا گیا کہ عدالت ان سفری پابندیوں سے متعلق اکتوبر میں تفصیلی سماعت کے بعد ہی ایک مفصل فیصلہ سنائے گی۔
واضح رہے کہ ڈونلڈ ٹرمپ نے صدراتی حکم نامے کے ذریعے چھ ایسے ملکوں کے شہریوں کے امریکا میں داخلے پر 3 ماہ کے لیے پابندی لگا دی تھی، جن کی آبادی اکثریتی طور پر مسلمان ہے، جن میں ایران، لیبیا، صومالیہ، سوڈان، شام اور یمن شامل ہیں۔