اسکول میں پڑھنے والے لڑکے لڑکیوں کیلئے شام کے اوقات میں ٹیوشن لینا پہلے اتنا ضروری تصور نہیں کیا جاتا تھا تاہم گزشتہ 3دہائیوں سے یہ سلسلہ بہت عام ہوگیا ہے۔
پہلے صرف بڑی جماعتوں کے طلباء و طالبات کو ٹیوشن کی ضرورت صرف اس لیے پیش آتی تھی کہ ان کے مضامین بہت مشکل اور انہیں ذہن نشین کرانے کیلئے ایک قابل استاد کی رہنمائی بھی بے حد ضروری تھی۔
لیکن اب والدین چھوٹی کلاس کے بچوں کو بھی گھر پر پڑھانے کی زحمت گوارا نہیں کرتے بلکہ انہیں ٹوشن سینٹرز بھیج دیا جاتا ہے، وقت کے ساتھ ساتھ نجی اسکولوں کی مارکیٹ کی طرح ٹیوشن سینٹرز میں بھی یہ والدین کی آمدنی پر منحصر ہے کہ ان کا بچہ کتنی مہنگی اور کس معیار کی ٹیوشن لیتا ہے۔
اے آر وائی نیوز کے پروگرام باخبر سویرا میں ماہر تعلیم فجر رابعہ پاشا نے ٹیوشن کی اہمیت اور اس کے فوائد و نقصانات کے حوالے سے گفتگو کی۔
ان کا کہنا تھا کہ تعلیم کی فراہمی کسی بھی ریاست کی اہم ذمہ داری ہوتی ہے یہ اسی کا کام ہے کہ سرکاری اور نجی اسکولوں میں پڑھائی کے معیار پر نظر رکھیں اور والدین کو بھی چاہیے کہ وہ ایسی کمیٹیاں تشکیل دیں جس سے وہ اسکول کے معیار تعلیم کے حوالے سے کوئی اقدام اٹھا سکیں۔
ایک سوال کے جواب میں ان کا کہنا تھا کہ ہونا تو یہ چاہیے کہ بچہ اسکول کا کام اسکول میں ہی ختم کرکے آئے اس پر ہوم ورک کا مزید بوجھ نہ ڈالا جائے جس کیلئے اسے ٹیوشن کا سہارا لینا پڑےن اس سے بچے کی صلاحیتیں متاثر ہوتی ہیں۔
