کراچی : امریکی دوشیزہ کے بعد تیونس کی لڑکی کی کراچی میں محبت کی شادی کا افسوسناک انجام سامنے آیا ہے۔

اے آر وائی نیوز کی رپورٹ کے مطابق امریکی خاتون اونیجا اینڈریو رابنسن کے بعد تیونس کی لڑکی بھی شادی کیلیے کراچی پہنچی، جسے محض 7 ماہ بعد ہی طلاق کا پروانہ مل گیا۔

19سالہ سندا ایاری کی سوشل میڈیا پر لیاری کے نوجوان عامر سے دوستی ہوئی تھی سندا 28نومبرکو تیونس سے پاکستان آئی اور اگلے ہی دن 29نومبر کو عامر سے شادی کی۔ نکاح نامہ 6 مارچ کو لیاری بغدادی کی یونین کونسل میں رجسٹرڈ کرایا گیا۔

عامر نے محض7ماہ بعد سندا کو طلاق دے دی، لڑکی کا وزٹ ویزا 18 فروری کو ختم ہوچکا ہے، لڑکی مدد کیلیے وومن تھانے پہنچ گئی۔

اس کا کہنا ہے کہ شوہر مجھے اپنے ساتھ رکھنا نہیں چاہتا، اخراجات کیلئے بھی رقم نہیں ہے، سندا نے اپیل کی ہے کہ میں اپنے وطن واپس جانا چاہتی ہوں، حکومت ایگزٹ پرمٹ جاری کرے۔

اس حوالے سے وومن پولیس حکام کا کہنا ہے کہ لڑکے کو تھانے بلوایا تھا، بیوی کو طلاق دینے کا کہہ کر واپس چلا گیا، پولیس کے مطابق مذکورہ لڑکی کو پناہ دے دی ہے، اس نے لڑکے کیخلاف کسی زیادتی کی شکایت نہیں کی۔