پاکستان سمیت دنیا بھر سے لوگوں کی بڑی تعداد ترکیہ کی جانب سفر کرتی ہے، جن میں طلباء و طالبات تاجر اور سیاح شامل ہیں۔
وہاں کے تاریخی اور سیاحتی مقامات اور تفریح کے منفرد ذرائع دنیا بھر سے سیاحوں کو تیزی سے ترکی کی طرف راغب کر رہے ہیں۔
پاکستان سے ترکیہ جانے والے خواہشمند افراد اس مضمون سے ترکیہ کے سفر میں پیش آنے والی ضروریات اور اہم معلومات سے متعلق استفادہ لے سکتے ہیں۔
وزٹ ویزا
پاکستان میں اناطولیہ ویزا ایپلی کیشن سینٹرز ترکی کے وزٹ ویزا کیلیے درخواستیں قبول کرتے ہیں۔ ترکی کے وزٹ ویزا کی درخواست کے ساتھ بینک اسٹیٹمنٹ، ہیلتھ انشورنس، ایئر ٹکٹ کی تفصیلات، تصویر، فنگر پرنٹس،ہوٹل ریزرویشن اور دیگر تفصیلات بھی جمع کرنا ضروری ہیں۔
فیس کی وصولی
اناطولیہ ویزا ایپلیکیشن سینٹر عام درخواست کے لیے 65 امریکی ڈالر اور وی آئی پی درخواست کے لیے 80 امریکی ڈالر کی سروس فیس وصول کرتا ہے۔
پاکستان سے سفر کرنے والے پاکستانیوں اور غیر ملکیوں کو ایکسچینج ریٹ کے مطابق ویزا فیس پاکستانی کرنسی میں ادا کرنا ہوگی۔
ملٹی پَل اور سنگل انٹری فیس کتنی ہے؟
مذکورہ ویزا فیس ناقابل واپسی ہے، ترکی میں ایک داخلے کے لیے سفارت خانے کی فیس امریکی ڈالر 60 اور متعدد داخلوں کے لیے امریکی ڈالر 190 ہے۔ 19 اپریل کے ایکسچینج ریٹ کے مطابق ایک امریکی ڈالر 280 پاکستانی روپے کے برابر ہے، اس لیے سنگل انٹری ویزا فیس 16 ہزار 800 روپے اور ملٹی پل انٹری فیس 53 ہزار 200 روپے ہے۔
ہیلتھ انشورنس
اس کے علاوہ یہ جاننا بھی ضروری ہے کہ صرف اناطولیہ ویزا درخواست مراکز سے دستیاب سفری ہیلتھ انشورنس قبول کی جائے گی، ٹریول ہیلتھ انشورنس کی میعاد بھی اس تاریخ سے شروع ہوگی جس تاریخ کو ویزا کی درخواست جمع کروائی گئی ہے۔
ترکی کا دورہ کرنے کے خواہشمند افراد کو ترکی کے سفارت خانے یا قونصل خانے کی ہدایات کے مطابق 3، 6 یا 12 ماہ کی بنیاد پر ترکی آنے والی ٹریول ہیلتھ انشورنس بھی حاصل کرنی چاہیے۔
تین ماہ کا سفری ہیلتھ انشورنس امریکی ڈالر55، 6 ماہ کا سفری ہیلتھ انشورنس امریکی ڈالر75 اور ایک سال کا سفری ہیلتھ انشورنس امریکی ڈالر95 ہوگا۔
