کابل: ٹوئٹر نے افغانستان کے متعدد سرکاری اکاؤنٹس سے نیلے بیجز ہٹا دیے۔
تفصیلات کے مطابق امریکی سوشل میڈیا پلیٹ فارم ٹوئٹر نے افغانستان میں حکومت کے زیر استعمال کئی اکاؤنٹس سے ’بلیو بیج‘ ہٹا دیے ہیں، جس سے تصدیق ہوتی ہے کہ مذکورہ اکاؤنٹ سرکاری اور مصدقہ ہے۔
ٹوئٹر نے افغانستان کے ایوان صدر کے آفیشل اکاؤنٹ ’ارگ‘ سے بھی نیلا بیج ہٹا دیا ہے، اس اکاؤنٹ سے پندرہ اگست کو طالبان کنٹرول کے بعد کوئی سرگرمی سامنے نہیں آئی، تاہم کور فوٹو تبدیل کر کے ’اللہ اکبر‘ شامل کیا گیا ہے، ایوان صدر کے اکاؤنٹ پر صدر اشرف غنی کی ویڈیوز، تصاویر اور پیغامات اب تک موجود ہیں۔
دیگر سرکاری اکاؤنٹس میں افغان وزارت خارجہ، وزارت دفاع، داخلی امور اور خزانہ کے اکاؤنٹس بھی شامل ہیں، جن پر تصدیقی علامت کے طور پر استعمال ہونے والی ’بلیو ٹک‘ ختم کر دی گئی ہے۔
واضح رہے کہ طالبان کی جانب سے وزارت خزانہ اور وزارت داخلہ کے اکاؤنٹس پر مسلسل اپ ڈیٹس شیئر کی جا رہی ہیں تاہم دیگر اکاؤنٹس کو استعمال نہیں کیا گیا۔
سابقہ افغان حکومت کے زیر استعمال بیرون ملک سفارتی مشن کے اکاؤنٹ سے بھی بلیو بیج ہٹا دیا گیا ہے، بھارت میں افغان سفارت خانے کے اکاؤنٹ سے بھی بلیو ٹک ہٹ گئی ہے۔
