سماجی رابطے کی ویب سائٹ ٹویٹر پر ویریفائیڈ اکاؤنٹس سے بلیو ٹک ہٹا دیے گئے جس کے بعد متعدد معروف شخصیات اپنے تصدیقی نشان سے محروم ہوگئیں۔
سابق وزیر اعظم پاکستان عمران خان، معروف فٹبالر کرسٹیانو رونالڈو اور بھارتی کرکٹر ویرات کوہلی سمیت کئی شخصیات اور اداروں کے ٹویٹر اکاؤنٹ سے بلیو ٹک غائب ہوگیا۔
ٹویٹر پر بلیو ٹک کے ذریعے صارف کے اکاؤنٹ کی تصدیق کی جاتی تھی کہ یہ اکاؤنٹ جعلی نہیں بلکہ اصلی ہی ہے تاہم اب یہ بلیو ٹک صارفین کے ویریفائیڈ اکاؤنٹس سے غائب ہونا شروع ہوگیا ہے۔
پاکستان کے سابق وزیر اعظم عمران خان جن کے ٹویٹر پر 19 ملین سے زیادہ فالوورز ہیں ان کے ٹویٹر اکاؤنٹ سے بھی بلیو ٹک غائب ہوگیا۔
اس کے علاوہ بالی وڈ کے شہنشاہ امیتابھ بچن جن کے ٹویٹر فالوورز کی تعداد 48 ملین سے زیادہ ہے جبکہ بالی وڈ کنگ شاہ رخ خان جن کے ٹویٹر پر 43 ملین سے زیادہ فالوورز ہیں وہ بھی ٹویٹر کے ویریفائیڈ اکاؤنٹ سے محروم ہوگئے۔
یہی نہیں بلکہ قومی کرکٹ ٹیم کے سابق کپتان شاہد آفریدی، موجودہ کپتان بابر اعظم، فاسٹ بولر شاہین آفریدی کے ٹویٹر اکاؤنٹ سے بھی بلیو ٹک غائب ہوگیا ہے۔
دراصل ویریفائیڈ ٹویٹر اکاؤنٹس سے بلیو ٹک کسی جادو کی وجہ سے غائب نہیں ہورہا بلکہ یہ ٹویٹر کے نئے مالک ایلون مسک کی ٹویٹر کی سبسکرپشن سروس کے تحت ہٹائے جارہے ہیں۔
ایلون مسک نے اکتوبر 2022 میں ٹویٹر کو خریدنے کے بعد مفت بلیو ٹک پروگرام کو کرپٹ قرار دیتے ہوئے اکاؤنٹ کو ویریفائیڈ کروانے کا عمل ماہانہ فیس سے مشروط کر دیا تھا۔
ایلون مسک نے نومبر 2022 کے شروع میں ٹویٹر بلیو سروس کو متعارف کروایا تھا مگر سبسکرپشن پلان متعارف کروانے کے بعد معروف شخصیات اور اداروں کے ناموں کے جعلی مصدقہ اکاؤنٹس کی بھرمار ہوگئی تھی جس کے بعد اسے معطل کردیا گیا۔
بعد ازاں 12 دسمبر 2022 کو اسے کچھ تبدیلیوں کے ساتھ دوبارہ پیش کیا گیا۔
ٹویٹر کی جانب سے سبسکرپشن سروس ٹویٹر بلیو کو دنیا بھر میں متعارف کروانے کے بعد گزشتہ ماہ اعلان کیا گیا تھا کہ یکم اپریل سے دنیا بھر سے صارفین کے اکاؤنٹس سے لیگسی بلیو ٹک کو ہٹانے کا سلسلہ شروع ہو جائے گا، بلیو ٹک کو برقرار رکھنے کے لیے ٹویٹر بلیو پر سائن اپ ہونا ہوگا۔
پاکستان میں ٹویٹر بلیو کی سبسکرپشن فیس ماہانہ 2250 روپے رکھی گئی ہے جبکہ دنیا کے دیگر ممالک میں یہ 8 سے 11 ڈالرز کے درمیان ہے۔
سبسکرپشن لینے کے بعد ٹویٹر بلیو سروس کے صارفین کو بلیو چیک مارک کے ساتھ ساتھ طویل ویڈیوز، 4000 حروف کے ٹویٹس اور ٹویٹ کو ایڈٹ کرنے سمیت متعدد نئے فیچرز تک رسائی فراہم کی جائے گی۔
