لندن : ٹوئٹر نے ویری فکیشن فیس نہ دینے پر معروف امریکی اخبار نیو یارک ٹائمز کا بلیو ٹِک ختم کر دیا ہے، ٹوئٹر نے یکم اپریل سے اعلان کردہ پالیسی پر عمل درآمد شروع کردیا۔
ایلون مسک نے طنزیہ ٹویٹ کیا کہ نیو یارک ٹائمز کا اصل غم یہ ہے کہ اب اُن کا پراپیگنڈہ مزیدار نہیں رہا، بالکل بھی پڑھا نہیں جاتا، ان کے پاس اصلی فالورز زیادہ ہوتے اگر وہ اپنے بہترین آرٹیکل لکھتے، یہ بات سب پبلیکیشنز کے لیے ہے۔
سماجی رابطے کی ویب سائٹ ٹوئٹر کی انتطامیہ کی جانب سے سبسکرپشن سروس ٹوئٹر بلیو کو پاکستان سمیت دنیا بھر میں متعارف کرا دیا گیا تھا جہاں صارفین ماہانہ فیس کے عوض ٹوئٹر اکاؤنٹ پر بلیو ٹِک حاصل کر سکتے ہیں۔
یاد رہے کہ نیو یارک ٹائمز، دی واشنگٹن پوسٹ، اور دی لاس اینجلس ٹائمز جیسے اہم ذرائع ابلاغ اور یہاں کام کرنے والے ملازمین نے بھی بلیو ٹک کی سبسکرپشن حاصل نہ کرنے کا اعلان کیا تھا۔
اس کے علاوہ کینیڈین اداکار ولیم شیٹنر، نامور امریکی باسکٹ بال کھلاڑی لیبرون جیمز سمیت متعدد شخصیات نے ٹوئٹر پر اپنے ویریفائیڈ اکاؤنٹ کے لیے ماہانہ 8 ڈالر ادا کرنے سے انکار کردیا ہے۔
