کراچی: پاکستان میری ٹائم سیکیورٹی ایجنسی نے دو امریکی جہازوں کو بحری بیڑے میں شامل کرلیا، پی ایم ایس ایس ’’سبقت‘‘ اور پی ایم ایس ایس ’’رفاقت‘‘ سمندری حدود میں گشت، نگرانی سرچ، ریسکیو اور نفاذ قانون جیسے آپریشن کو موثر انداز میں نبھانے کی بھرپور صلاحیت رکھتے ہیں۔
اس ضمن میں پی این ایس ڈاکیارڈ میں پی ایم ایس ایس سبقت اور رفاقت کی پاکستان میری ٹائم سیکیورٹی ایجنسی کے بحری بیڑے میں شمولیت کی تقریب منعقد ہوئی۔تقریب کے آغاز میں پی ایم ایس اے کے چاق و چوبند دستے نے مہمان خصوصی وائس ایڈمرل (ر) طیب علی ڈوگر کو سلامی پیش کی۔
وائس ایڈمرل (ر) طیب علی ڈوگر نے تقریب سے خطاب کرتے ہوئے کہا کہ پی ایم ایس ایس سبقت اور رفاقت کی شمولیت سے پی ایم ایس اے کی صلاحیتوں میں اضافہ ہوگا۔
ریئر ایڈمرل راجہ جمیل اختر نے بتایا کہ پی ایم ایس اے کے بحری بیڑے میں ہیلی کاپٹر کی شمولیت کے لیے وزارت دفاع کو پی سی ون ارسال کردیا ہے۔
ڈی جی پی ایم ایس اے کا کہنا تھا کہ سمندری حدود کی نگرانی کو مزید موثر بنانے کے لیے یاک اور کولاچی جہاز پاکستان میری ٹائم سیکیورٹی ایجنسی کا حصہ بن جائیں گے جبکہ اگلے سال مارچ تک 600 سو اور 1500 سو ٹن وزنی جہاز بھی شامل کیے جائیں گے۔
