بوگوٹا : کولمبیا کے ہوائی اڈے پر کھڑے مسافر طیارے سے دو لاشیں ملی ہیں، مذکورہ لاشیں طیارے کے پچھلے پہیوں کے اندر پھنسی ہوئی تھیں۔
تفصیلات کے مطابق کولمبیا کے دارالحکومت بوگوٹا کے الدورادو ہوائی اڈّے پر ایک طیارے کے عقبی پہیوں کے حصے سے دو افراد کی لاشیں برآمد ہوئی ہیں۔
غیرملکی خبر رساں ادارے کی رپورٹ میں بتایا گیا ہے کہ الدورادو ہوئی اڈے پر کھڑے آویانکا فضائی کمپنی کے مسافر طیارے کی دیکھ بھال کے دوران طیارے کے پچھلے پہیوں کے حصے سے دو لاشیں ملی ہیں۔
اس حوالے سے آویانکا ایئر لائنز کے حکام نے جاری کردہ بیان میں کہا ہے کہ بوگوٹا کے الدورادو ایئر پورٹ پہنچنے پر فضائی کمپنی کے عملے کو طیارے کے عقبی پہیوں کے حصے سے 2 لاشیں ملی ہیں۔ ہم ہلاک ہونے والوں کے اہل خانہ سے اظہارِ تعزیت کرتے ہیں۔
اٹارنی دفتر کے جاری کردہ بیان کے مطابق طیارے سے ملنے والی لاشیں 15 سے 20 سال کے نوجوان لڑکوں کی ہیں، بظاہر یہ دو لڑکے افریقہ النسل سے تعلق رکھتے ہیں تاہم لاشوں کی مکمل شناخت کے لئے کارروائی جاری ہے۔
بیان میں مزید کہا گیا ہے کہ طیارے کی آخری بار دیکھ بھال27 دسمبر کو کی گئی تھی۔ ملنے والی لاوارث لاشیں سرد خانے میں رکھی گئی ہیں، ابتدائی طبی معائنے میں ایک لاش پر جلنے کے نشانات دیکھے گئے ہیں۔
