کراچی : کرائم برانچ نے متحدہ قومی موومنٹ لندن سے تعلق رکھنے والے 2 ٹارگٹ کلرز کو حراست میں لے لیا ہے ملزمان نے دوران ہڑتال پولیس موبائل پر فائرنگ کی تھی جس کے نتیجے میں ایک پولیس اہلکار شہید ہوگیا تھا۔
تفصیلات کے مطابق کراچی کے علاقے الفلاح میں کرائم برانچ ٹو نے کامیاب کارروائی کرتے ہوئے قتل، بھتہ خوری اور جلاؤ گھیراؤ میں مطلوب دو خطرناک ٹارگٹ کلرز کو گرفتار کر لیا ہے۔
ایس ایس پی کرائم برانچ طارق مغل نے پریس کانفرنس میں بتایا کہ دونوں ٹارگٹ کلرز کا تعلق ایم کیو ایم کے لندن گروپ سے ہے جنہوں نے 2011 میں دورانِ ہڑتال پولیس موبائل پر فائرنگ کی تھی جس کے نتیجے میں پولیس اہلکار آفتاب شاہ شہید ہوگیا تھا جب کہ ملزمان فرار ہونے میں کامیاب ہو گئے تھے۔
دونوں دہشت گردی مزید کارروائی کی تیاری کررہے تھے، پولیس
ایس ایس پی کرائم برانچ کا کہنا ہے کہ کارروائی خفیہ اطلاعات کی بنیاد کی گئی جس میں بتایا گیا تھا کہ دونوں دہشت گرد علاقے میں موجود ہیں اور کسی کارروائی کی منصوبہ بندی کر رہے ہیں جس پر فوری ایکشن لیتے ہوئے ملزمان کو گرفتار کر لیا گیا۔
ایس ایس پی طارق مغل نے بتایا کہ ملزمان متحدہ قومی موومنٹ لندن گروپ کے الفلاح یونٹ کے ذمہ داران ہیں اور دہشت گردی کی متعدد وارداتوں میں بھی مطلوب تھے۔
