اسلام آباد : اسلام آباد ہائی کورٹ نے کاغذات نامزدگی میں مبینہ بیٹی ظاہرنہ کرنے پر عمران خان کی نااہلی کیس میں لارجربینچ بنانے کا فیصلہ کرلیا۔
تفصیلات کے مطابق اسلام آباد ہائی کورٹ میں کاغذات نامزدگی میں مبینہ بیٹی ظاہرنہ کرنے پرعمران خان کی نااہلی کیس پر سماعت ہوئی۔
درخواست گزار ساجد محمود کی جانب سے سلمان بٹ عدالت میں پیش ہوئے ، عمران خان کے وکیل سلمان اکرم راجہ سپریم کورٹ میں مصروفیت کےباعث پیش نہ ہوسکے۔
معاون وکیل سلمان بٹ نے کہا سلمان اکرم راجہ بنچ نمبر ون میں پیش ہوئے ہیں، وکیل سلمان اکرم راجہ نے تحریری جواب جمع کرایا ہے۔
چیف جسٹس عامر فاروق نے دوران سماعت ریمارکس دیے کہ عمران خان کے وکیل نے جواب میں کہا ہے کہ عمران خان مزید رکن قومی اسمبلی نہیں رہے۔۔ جس بیان حلفی پر درخواست آئی ہے وہ دو ہزار اٹھارہ کی ہے
عدالت نے کہا کہ مناسب ہوگا کہ عمران خان سےمتعلق نئی صورتحال کا پتہ چلے، جواب میں بنچ کے اوپر بھی اعتراض اٹھایا گیا ہے۔.
اسلام آباد ہائیکورٹ کا عمران خان کی نااہلی کے کیس میں لارجربینچ بنانے کا فیصلہ کرتے ہوئے کیس کی سماعت نو فروری تک ملتوی کردی۔
