جنیوا: تجارتی مذاکرات کے بعد امریکا اور چین کا 90 دنوں کے لیے ٹیرف میں کمی کا اعلان کردیا ساتھ ہی اقتصادی اور تجارتی تعلقات پر بات چیت جاری رکھنے پر اتفاق کیا گیا۔
تفصیلات کے مطابق امریکا اور چین نے ایک دوسرے پر ٹیرف نوے دن کیلئے کمی کا اعلان کردیا، خبر رساں ایجنسی نے کہا کہ چین امریکی اشیا پر ٹیرف 125 سے کم کرکے 10فیصد کرنے اور امریکا چینی اشیا پر محصولات 145 سے کم کرکے 30 فیصد کرنے کو تیار ہے۔
جنیوا میں امریکا اور چین کے تجارتی مذاکرات کے بعد امریکی سیکرٹری تجارت اسکاٹ بینیٹ نے کہا کہ امریکا نے چین پر ٹیرف کم کرکے ایک سو پندرہ فیصد کردیا ہے تاہم امریکی مصنوعات پرچین کا دس فیصد ٹیرف برقرار رہے گا، اضافی چوبیس فیصد چینی ٹیرف نوے دن کیلئے معطل ہوگا۔
اسکاٹ بینیٹ کا کہنا تھا کہ دونوں ملکوں نے اقتصادی اور تجارتی تعلقات پر بات چیت جاری رکھنے پر اتفاق کیا ہے۔
یاد رہے جنیوا میں امریکا اورچین کے درمیان تجارتی معاہدہ ہوا، امریکی وزیر خزانہ نے بتایا تھا چین کے ساتھ مذاکرات میں نمایاں پیش رفت ہوئی ہے، تجارتی معاہدے کی تفصیلات کل صبح جاری کی جائیں گی۔
ان کا کہنا تھا کہ تجارتی معاہدے پر پیشرفت کا اعلان کرتے ہوئے خوشی ہو رہی ہے، سوئٹزر لینڈ کی میزبانی پر شکریہ ادا کرتا ہوں، چین کے ساتھ مذاکرات انتہائی مثبت رہے ہیں۔
واضح رہے کہ اپریل میں امریکا نے چین سے آنے والی اشیا پر ایک سو پینتالیس فیصد اضافی ٹیرف عائد کیے تھے، جس کے جواب میں امریکی مصنوعات پر محصولات کو بڑھا کر ایک سو پچیس فیصد کر دیا گیا تھا۔
