دبئی: نئے سال کے آغاز پر متحدہ عرب امارات کی حکومت نے تارکین وطن کے لیے متعدد شاندار اعلانات کیے ہیں۔
عرب میڈیا کے مطابق متحدہ عرب امارات حکومت نے سرمایہ کاروں اور مختلف شعبوں کے ماہرین کو سنگل ویزہ پر دس سال تک قیام کی اجازت دینے کا فیصلہ کیا ہے۔
امارتی کابینہ نے مختلف شرائط پر ریٹائرمنٹ کے بعد بھی دبئی میں سکونت اختیار کرنے والے تارکین وطن کو اجازت دینے کا فیصلہ کیا ہے۔
کابینہ کے فیصلے کے مطابق 55 سال سے زائد عمر کے افراد اب ریٹائرمنٹ کے بعد بھی دبئی میں رہ سکیں گے اگر وہ کابینہ کی جانب سے طے کردہ پیمانے پر پورا اترتے ہوں گے۔
مزید پڑھیں: متحدہ عرب امارات کے ویزے کے لیے 15 سیکنڈ میں اپلائی کریں، نئی سروس متعارف
عرب میڈیا کے مطابق ریٹائرمنٹ کے بعد بھی امارات میں رہنے کے لیے خواہش مند شخص کی 20 لاکھ درہم کی جائیداد ہو یا اس کی بچت میں 10 لاکھ امارتی درہم موجود ہوں، علاوہ ازیں اگر متعلقہ شخص 20 ہزار درہم ماہانہ آمدنی کا حامل ہے تو بھی وہ ریٹائرمنٹ کے بعد امارات میں رہ سکتا ہے۔
اماراتی حکام کا کہنا ہے کہ نئے قوانین کے تحت تارکین وطن کو کمپنیوں کی 100 فیصد ملکیت رکھنے کا بھی اختیار مل سکے گا جبکہ غیرملکی سرمایہ کاروں، کاروباری افراد اور مختلف شعبوں کے ماہرین کو ایک ہی ویزہ پر دس سال قیام کی اجازت بھی دی جاسکے گی۔
معروف قانون دان ڈاکٹر الخزرجی کا کہنا تھا کہ حکومت کا حالیہ اقدام ان لوگوں کے لیے خوشی کا باعث ہے جو ہمیشہ متحدہ عرب امارات میں رہنے اور کام کرنے کے خواہش مند ہیں تاہم ان کے پاس ریٹائرمنٹ کے بعد جانے کے لیے کوئی جگہ نہیں ہوتی اور وہ لوگ خود کو ایڈجسٹ کرنے کے لیے پریشانی اٹھاتے ہیں۔
