متحدہ عرب امارات میں ٹریفک جرمانوں پر رعایتی اسکیم کا اعلان کر دیا گیا۔
خلیج ٹائمز کے مطابق اس بات کا اعلان منگل کو شارجہ ایگزیکٹو کونسل کے اجلاس میں کیا گیا۔ اسکیم کے تحت شارجہ میں گاڑی چلانے والوں کو ٹریفک جرمانے پر 35 فیصد تک کی رعایت ملے گی اگر وہ جرمانے جلد ادا کریں گے۔
اسکیم کا آغاز 1 اپریل 2023 سے ہوگا۔ اگر خلاف ورزی کے ارتکاب کی تاریخ کے 60 دنوں کے اندر جرمانے کی ادائیگی کی جاتی ہے تو گاڑی چلانے والوں کو 35 فیصد رعایت ملے گی۔
اگر جرمانہ 60 دن بعد اور خلاف ورزی کے ایک سال کے درمیان ادا کیا جائے گا اس پر 25 فیصد رعایت ملے گی۔ یہ رعایت صرف جرمانے کی رقم پر لاگو ہوتی ہے۔
ٹریفک جرم کے ارتکاب کے ایک سال بعد ادا کرنے پر جرمانے یا فیس پر کوئی رعایت لاگو نہیں ہوگی۔ ابوظہبی میں بھی ایسی ہی ایک اسکیم موجود ہے جو فیس کی جلد ادائیگی پر رعایت فراہم کرتی ہے۔
