یوگنڈا کے کرکٹر ریاضت علی شاہ کا کہنا ہے کہ بابر اعظم اور ویرات کوہلی کیخلاف میچ کھیلنا چاہتا ہوں۔
ٹی 20 ورلڈ کپ میں یوگنڈا کرکٹ ٹیم پہلی بار حصہ لے گی، یوگنڈا نے کوالیفائر میں حریف ٹیموں کو شکست دے کر ٹی 20 ورلڈ کپ کے لیے کوالیفائی کیا۔
یوگنڈا کے کھلاڑی ریاضت علی شاہ نے اے آر وائی نیوز سے گفتگو کرتے ہوئے کہا کہ کرکٹ کی شروعات گلگت سے کی، اسلام آباد میں بھی کرکٹ کھیلی۔
انہوں نے بتایا کہ یوگنڈا کے کلب کے لیے کینیا کے اسٹیو ٹیکیلو نے سلیکٹ کیا تھا، اچھی کارکردگی دکھانے پر یوگنڈا ٹیم میں کھیلنے کا موقع ملا۔
ریاضت علی نے کہا کہ ٹی 20 ورلڈ کپ کھیلنا میرے لیے اعزاز کی بات ہے، خواہش ہے یوگنڈا کو پاکستان اور بھارت کے گروپ میں شامل کیا جائے کیونکہ بابر اعظم اور ویرات کوہلی کیخلاف میچ کھیلنا چاہتا ہوں۔
انہوں نے کہا کہ وسیم اکرم کی بولنگ اور کیون پیٹرسن کی بیٹنگ پسند ہے۔
واضح رہے کہ گزشتہ ماہ افریقی ریجن کوالیفائر ایونٹ میں تاریخ رقم کرتے ہوئے نوآموز یوگنڈا کی ٹیم نے انٹرنیشنل ٹی ٹوئنٹی ٹیم زمبابوے کو شکست سے دوچارکیا تھا۔
زمبابوے کی ٹیم نے پہلے کھیلتے ہوئے مقررہ اوورز میں 7 وکٹوں کے نقصان پر 136 رنز بنائے تھے۔ کپتان سکندر رضا نے 39 گیندوں پر 48 رنز اسکور کیے تھے۔
ہدف کے تعاقب میں یوگنڈا کی ٹیم نے شاندار کارکردگی کا مظاہرہ کیا اور ایک اوور قبل ہی 5 وکٹوں کے نقصان پر 137 رنز بنا کر جیت اپنے نام کی تھی۔
