لندن: برطانیہ نے پاکستان سے شہریوں کی واپسی کے لیے مزید 9 چارٹرڈ پروازوں کا اعلان کر دیا۔
تفصیلات کے مطابق برٹش ہائی کمشنر کرسچن ٹرنر نے کہا ہے کہ پاکستان میں موجود برطانوی شہریوں کی واپسی کے لیے مزید 9 چارٹرڈ پروازیں چلائی جا رہی ہیں، اس سلسلے میں 30 اپریل کو پرواز کراچی سے برطانیہ آئے گی۔
برٹش ہائی کمشنر کے مطابق ان 9 پروازوں سے مزید 2250 مسافر برطانیہ آئیں گے، 3 پروازیں لاہور اور 5 اسلام آباد سے روانہ ہوں گی۔ خیال رہے کہ اب تک 10500 سے زائد برطانوی شہری واپس آ چکے ہیں۔
برطانیہ میں کورونا وائرس کی ایک اور لہر آنے کا خطرہ
برطانیہ بھی کرونا وائرس سے شدید متاثرہ ممالک میں سے ایک ہے، جہاں وائرس اب تک 19,506 افراد کی جانیں لے چکا ہے، اور متاثرہ افراد کی تعداد بڑھ کر 143,464 ہو گئی ہے، برطانیہ نے تاحال صحت یاب ہونے والے مریضوں کا ڈیٹا جاری نہیں کیا ہے، تاہم بتایا جا رہا ہے کہ برطانیہ میں کرونا کے مریضوں کی صحت یابی کا گراف نہایت کم ہے۔
دو دن قبل برطانوی وزیر خارجہ ڈومینک راب نے برطانیہ میں کرونا وائرس کی ایک اور لہر آنے کا امکان ظاہر کرتے ہوئے کہا تھا کہ اس نئی لہر آنے کی صورت میں ملک ایک اور لاک ڈاؤن کی طرف جائے گا۔
