لندن: برطانیہ کے کچھ حصوں میں 24 گھنٹوں میں ایک ماہ سے زیادہ کی بارش برسنے کے باعث سیلاب آ گیا ہے۔
غیر ملکی میڈیا رپورٹس کے مطابق برطانیہ کے بیش تر علاقوں میں موسلادھار بارش کے باعث انگلینڈ اور ویلز کے کچھ حصوں میں بڑے پیمانے پرسیلابی صورت حال ہے۔
سڑکیں تالاب بن گئی ہیں، گاڑیاں پانی میں ڈوب گئیں، کئی موٹر ویز اور اہم شاہراہیں بند کر دی گئیں، بس اور ٹرین سروسز بھی شدید متاثر ہوئی ہیں، نظام زندگی بری طرح مفلوج ہو کر رہ گیا ہے۔
میٹ حکام کے مطابق 120 ملی میٹر بارش ریکارڈ کی گئی ہے، میٹ آفس نے شدید سیلاب کا خطرہ بھی ظاہر کر دیا ہے، وسطی اور جنوبی انگلینڈ کے بیش تر علاقوں کے لیے میٹ آفس نے خراب موسم کی وارننگ پہلے ہی جاری کر رکھی تھی، زرد موسم کی وارننگ ویلز اور انگلینڈ کے بیش تر علاقوں کے لیے جاری کی گئی، اور انوائرونمنٹ ایجنسی کے پاس اس وقت سیلاب کی 12 وارننگز ہیں۔
میڈیا رپورٹس کے مطابق موسلا دھار بارش سے نارتھمپٹن شائر، بیڈ فورڈ شائر اور لندن کے کچھ حصے زیر آب آ گئے ہیں، ماحولیاتی ایجنسی کے مطابق ہرٹ فورڈ شائر، بیڈ فورڈ شائر، کینٹ اور ہوم کاؤنٹیز میں کم از کم 45 گھر سیلاب کی زد میں آئے ہیں۔
واضح رہے کہ برطانیہ اس وقت 200 میل چوڑے طوفان ’میگا اسٹارم‘ کی زد پر ہے، جہاں بڑے علاقے پورا دن بارش کی زد پر رہے۔
