لندن: برطانوی ممبران پارلیمنٹ نے اقوام متحدہ کے سیکریٹری جنرل کو خط لکھ کر اپیل کی ہے کہ مسئلہ کشمیر پر پاکستان اور بھارت جنگ کے دہانے پر کھڑے ہیں، اقوام متحدہ کردار ادا کرے۔
تفصیلات کے مطابق مقبوضہ کشمیر میں بھارت کی جانب سے غیر قانونی اقدام کے خلاف برطانوی پارلیمنٹ کے اراکین بھی خاموش نہ رہ سکے۔
پارلیمنٹ کے اراکین نے اقوام متحدہ کے سیکریٹری جنرل کو خط لکھ کر کردار ادا کرنے کی اپیل کی، اس خط پر 47 ممبران پارلیمنٹ نے دستخط کیے۔
خط میں کہا گیا کہ بھارت نے کشمیری قیادت کو نظر بند کر رکھا ہے، بھارت نے کشمیر کا رابطہ دنیا سے منقطع کر دیا ہے، کشمیر پر پاکستان، بھارت جنگ کے دہانے پر کھڑے ہیں۔
یہ بھی پڑھیں: بھارتی اقدامات کے خلاف سلامتی کونسل میں جانے کا فیصلہ کیا ہے: وزیر خارجہ
برطانوی ممبران پارلیمنٹ نے خط میں لکھا کہ اقوام متحدہ اس مسئلے کے حل کے لیے اپنا کردار ادا کرے۔
واضح رہے کہ بھارت نے آئین کے آرٹیکل 370 کی منسوخی کے ذریعے جموں و کشمیر کی خصوصی حیثیت تبدیل کر کے وادی کو انڈیا کے ساتھ باقاعدہ طور پر شامل کر لیا ہے۔
بھارت کی جانب سے وادی میں اضافی فوج بھی تعینات کی جا چکی ہے، اور اس وقت وہاں کرفیو نافذ ہے، مقبوضہ کشمیر ایک قید خانے میں تبدیل ہو چکا ہے۔
پاکستان نے بھی بھارت کے غیر قانونی اقدام پر اقوام متحدہ کے سلامتی کونسل میں جانے کا فیصلہ کیا ہے، وزیر خارجہ شاہ محمود قریشی نے پریس کانفرنس کرتے ہوئے کہا کہ 28 ممالک سے مقبوضہ کشمیر سے متعلق اپنی تشویش سے اظہار کر دیا ہے۔
