حکومت پاکستان کی جانب سے یوکرین میں پھنسے پاکستانی شہریوں کی واپسی کیلئےاقدامات جاری ہیں، پی آئی اے کی خصوصی پرواز سے232 پاکستانی وطن واپس پہنچ گئے۔
پی آئی اے کا خصوصی طیارہ حکومت پاکستان کی ہدایات پر گزشتہ روز صبح پاکستان سے پولینڈ کے دارالحکومت وارسا بھیجا گیا تھا۔
پی آئی اے کی پرواز پی کے 7788نے رات 12بجے اسلام آباد کے ہوائی اڈے پر لینڈ کیا، وطن واپس پہنچنے پر انتہائی جذباتی مناظر دیکھنے میں آئے، اس موقع پر پی آئی اے اور وزارت خارجہ کی حکام بھی ائیرپورٹ پر موجود تھے۔
Proud to serve Pakistan, on instructions of @GovtofPakistan &support by @foreignofficePk, #PIA launched first flight to evacuate stranded Pakistanis, demonstrating true character of PIA, that’s not about commercial but proving yet again that anything for Pakistan, bravo team PIA pic.twitter.com/XLHNXhsZkz
— Air Marshal Arshad Malik (@amarshadmalik) March 9, 2022
وطن واپسی کی خوشی میں بہت سے مسافر آبدیدہ ہوکر پاک سرزمین پر سجدہ ریز ہوگئے، اس موقع پر مسافروں نے پاکستان زندہ باد اور پی آئی اے پائندہ باد کے نعرے بھی لگائے۔
یاد رہے کہ گزشتہ روز ترجمان پی آئی اے عبدللہ خان نے اے آر وائی نیوز کے نمائندے کو بتایا تھاکہ طیارہ وزارت خارجہ کی اجازت پر روانہ کیا گیا ہے، حکومت پاکستان کی ہدایات پر مزید پروازیں بھی آپریٹ کی جائیں گی۔
ترجمان دفتر خارجہ کا کہنا ہے کہ یوکرین میں سات ہزار پاکستانی موجود تھے جن میں تین ہزار طالب علم اور چار ہزار شہری شامل تھے ترجمان کے مطابق زیادہ تر شہری 24 فروری کو سفارتخانے کے کہنے پر یوکرین چھوڑ چکے ہیں۔
مزید پڑھیں : یوکرین سے پاکستانیوں کی واپسی، پی آئی اے کا طیارہ پولینڈ پہنچ گیا
دفتر خارجہ نے گزشتہ روز بتایا تھاکہ 1525 پاکستانیوں کو یوکرین سے ہنگری، پولینڈ، رومانیہ منتقل کیا جاچکا ہے، پی آئی اے کا طیارہ صبح روانہ ہوگا اور اسی روز شام تک واپس آجائے گا۔
خیال رہے کہ گزشتہ دنوں یوکرین میں پھنسے پاکستانی شہریوں اور طلبا کی واپسی کے لیے آپریشن تیار کیا گیا تھا، سی ای او پی آئی اے ارشد ملک اور یوکرین میں پاکستانی سفیر کے درمیان رابطہ ہوا تھاجس میں یوکرین میں پھنسے پاکستانی شہریوں کی محفوظ مقام پر منتقلی اور وطن واپسی سے متعلق گفتگو کی گئی تھی۔
