الٹرا لو ایمیشن زون آج سے پورے لندن میں نافذ ہو گیا جس کے تحت آلودگی پھیلانے والی گاڑیوں کے ڈرائیورز کو یومیہ ہرجانہ ادا کرنا ہوگا۔
غیر ملکی میڈیا کے مطابق الٹرا لو ایمیشن زون آج سے پورے لندن میں نافذ ہو گیا جس کے تحت آلودگی پھیلانے والی گاڑیوں کے ڈرائیورز کو گاڑی چلانے کی سورت میں یومیہ ساڑھے 12 پاؤنڈ جرمانہ ادا کرنا ہوگا۔
رپورٹ کے مطابق لندن کی انتظامیہ نے یہ فیصلہ شہر کی فضا کو بہتر بنانے کے لیے کیا ہے اور اس حوالے سے میئر لندن صادق خان کا کہنا ہے کہ لندن کی فضا کو بہتر بنانے کیلئے الٹرا لو ایمیشن زون میں توسیع ضروری ہے کیونکہ فضائی آلودگی کے سبب لندن میں 4 ہزار افراد قبل از وقت موت کے منہ میں جارہے ہیں۔
میئر لندن نے الٹرا لو ایمیشن زون کی توسیع کے ساتھ ماحول دوست گاڑی کے خریداروں کے لیے خصوصی رعایتی پیکیج لانے کا بھی اعلان کیا ہے۔
دوسری جانب لندن کے اطراف میں واقع کونسلوں کی جانب سے اس توسیع کی مخالفت کی گئی ہے اور 7 میں سے 6 کونسلوں نے زون کی توسیع سے متعلق سائن لگانے کے حوالے سے ٹرانسپورٹ فار لندن سے معاہدہ کرنے سے انکار کر دیا ہے۔
واضح رہے کہ الٹرا لو ایمیشن زون (Ulez) کی توسیع برطانیہ اور یورپ میں ہوا کے معیار کو بہتر بنانے کے لیے لائی گئی اسکیموں میں سے ایک ہے۔
