قومی کرکٹر عمر اکمل کا کہنا ہے کہ ڈومیسٹک کرکٹ کے لیے کروڑوں روپے کی لیگز چھوڑیں لیکن مجھے کیا ملا۔
قومی ٹیم کے مڈل آرڈر بیٹر عمر اکمل نے حالیہ پوڈ کاسٹ میں شرکت کی اور میزبان کے سوال پر انہوں نے کرکٹ بورڈ سے شکوہ کردیا۔
عمر اکمل نے کہا کہ میں نے پاکستان کے لیے بڑے کنٹریکٹس چھوڑے اور ہمیشہ ایک ہی موقف تھا کہ پاکستان کے لیے ہی کھیلنا ہے، ڈومیسٹک کرکٹ کھیلنا ہے۔
انہوں نے کہا کہ میں نے پاکستان کرکٹ کے لیے بگ بیش، بی پی ایل جیسی قیمتیں آفرز چھوڑ دیں، اس وقت ایک لاکھ ڈالرز یعنی کروڑوں پاکستانی روپے کی آفرز دی گئی لیکن مجھ سے کہا گیا آپ نے پاکستان کے لیے ڈومیسٹک کرکٹ کھیلنی ہے تاکہ نئے آنے والے لڑکے آپ سے سیکھ سکیں۔
عمر اکمل نے کہا کہ اگر میں نے ڈومیسٹک کرکٹ کے لیے اتنی قربانیاں دیں تو پاکستان کرکٹ مجھے کیا دے رہی ہے۔
واضح رہے کہ عمر اکمل کو پی ایس ایل سیزن 9 کے ڈرافٹ میں کسی بھی فرنچائز کی جانب سے منتخب نہیں کیا گیا ہے۔
