یروشلم : اسرائیلی فورسز نے مسلسل دوسرے روز بھی مسجد اقصی پر حملہ کردیا اور نمازیوں پر تشدد کیا ، جس کے نتیجے میں 6 فلسطینی زخمی ہوگئے۔
تفصیلات کے مطابق صیہونی فورسز باز نہ آئی اور دوسرے دن بھی مسجدِ اقصیٰ پر دھاوا بول دیا، قابض فوج دروازہ توڑ کر مسجد میں داخل ہوئی اور عبادت کرنے والے نمازیوں پراسٹن گرنیڈ فائر کیے اور ربڑ کی گولیاں برسا دیں۔
فلسطینی حکام کا کہنا ہے کہ اس دوران قابض فورسز کے تشدد سے چھ افراد زخمی ہوئے جبکہ مقامی ذرائع نے بتایا کہ قابض فوج اور پولیس نے مسجد القبلی کا محاصرہ کر کے وہاں پر نمازیوں کو داخلے سے روک دیا۔
گذشتہ روز بھی صیہونی فوج نے مسجدِ اقصیٰ میں نمازیوں پر حملہ کر کے اسے میدان جنگ بنادیا تھا، اسرائیلی فورسز نے عبادت میں مصروف لوگوں کو بہیمانہ تشدد کا نشانہ بنایا، جس کے نتیجے میں خواتین اور بچوں سمیت متعدد فلسطینی زخمی ہوئے جبکہ تین سو سے زائد افراد کو حراست میں لیا گیا تھا۔
فلسطینی اتھارٹی کے سربراہ محمود عباس کے ترجمان کا کہنا تھا مسجد اقصیٰ پرحملہ سُرخ لکیرعبورکرنے کی کوشش ہے، ایسا کرکےصیہونی فوج خانہ جنگی کودعوت دے رہی ہے جبکہ سعودی عرب ، مصر اور اردن نے مسجد اقصی پر حملے کی مذمت کرتے ہوئے اسے ناقابلِ قبول قرار دیا۔
