خیرپور: صوبہ سندھ کے ضلع خیرپور میں پولیس نے بروقت کارروائی کرتے ہوئے کم عمر جوڑے کی شادی کو ناکام بنادیا ہے۔
پولیس ذرائع کے مطابق اطلاع ملی تھی کہ کوٹ ڈینل محلے میں کم عمر بچوں کی شادی کرائی جارہی ہے، رپورٹ ملنے پر پولیس فوری طور پر حرکت میں آئی اور شادی کی جگہ پر چھاپا مارا۔
پولیس کے مطابق عین موقع پر کارروائی کرتے ہوئے کم عمر بچوں کی شادی کو ناکام بنایا، دولہے کی عمر 14 جبکہ دلہن کی عمر 13 سال کے درمیان ہیں، کارروائی کے دوران پولیس نے دولہے اور دلہن کے والدین سمیت 20 باراتیوں کو بھی گرفتار کیا، تاہم نکاح خواں موقع سے فرار ہوگیا۔
پولیس کا کہنا ہے کہ ذمے داروں کے خلاف سندھ چائلڈ میرج ریگرینٹ ایکٹ کے تحت مقدمے کا اندراج کرلیا گیا ہے جبکہ کم عمر جوڑے کو عدالت میں پیش کیا جائے گا۔
صوبہ سندھ میں کم عمر بچیوں کی زبردستی شادیوں کا سلسلہ تھمنے کا نام ہی نہیں لے رہا ہے، رواں ماہ بھی صوبہ سندھ کے ضلع نوشہرو فیروز میں پانچویں جماعت کی طالبہ کی شادی کرانے پر دولہا اور دلہن کے والد کو گرفتار کیا گیا تھا۔
یہ بھی پڑھیں: کم سن طالبہ کی شادی کرانے پر دلہن اور دولہا کا والد گرفتار
اس سے قبل جنوری دوہزار بیس میں بھی پولیس نے شکار پور میں شادی کی تقریب میں چھاپہ مار کر 12 سال کی بچی کا 13 سال کے لڑکے سے نکاح ناکام بنادیا تھا۔
واضح رہے کہ پاکستان میں ابھی تک سندھ ایسا صوبہ ہے جس نے 2014 میں قانون سازی کے ذریعے 18 سال سے کم عمر بچیوں کی شادی پر مکمل پابندی عائد کررکھی ہے سندھ میں کم عمر لڑکی سے شادی کرنے کی سزا تین سال قید ہے۔ اسی طرح شادی کے عمل کو سہولت فراہم کرنے والے چاہے وہ والدین ہی کیوں نہ ہوں ان کی سزا دو سال قید مقرر کی گئی ہے۔
