متحدہ عرب امارات (یو اے ای) میں نا بینا افراد سے متعلق اچھی خبر سامنے آئی ہے، یو اے ای کے بینک کی جانب سے بصارت سے محروم افراد کیلئے پہلی مخصوص ایپ لانچ کردی گئی ہے۔
بین الاقوامی خبر رساں ادارے کی رپورٹ کے مطابق یو اے ای کے ایک بینک نے ملک میں اپنی نوعیت کی پہلی سروس کے طور پر نابینا افراد کی سہولت کے لیے اسکرین ریڈر کے ساتھ اپنی ایپ کو اپ ڈیٹ کردیا ہے۔
بینک کی جانب سے یہ اقدام ایسے وقت میں سامنے آیا ہے کہ جب ایک ضعیف صارف نے بینک سے رابطہ کیا اور ایپ کو صحیح طریقے سے استعمال نہ کرنے کی شکایت کی۔
نئے اقدام کا اعلان شارجہ اسلامک بینک (SIB) نے بصارت سے محروم لوگوں کے ساتھ سلسلہ وار ملاقاتوں کے بعد کیا تاکہ انہیں آزاد بینکاری خدمات حاصل کرنے کی اجازت دینے کے بہترین طریقے تلاش کیے جاسکیں۔
شارجہ اسلامک بینک کے ڈیجیٹل بینکنگ کے سربراہ ولید العمودی کا اس حوالے سے کہنا تھا کہ اس مواصلت کے نتیجے میں SIB کی ڈیجیٹل موبائل ایپلیکیشن میں بصارت سے محروم لوگوں کے لیے اسکرین ریڈر سروس کی فراہمی کا آغاز کردیا گیا ہے۔
بصارت سے محروم لوگوں کے ایک گروپ کے تعاون سے ایس آئی بی کے ڈیجیٹل بینکنگ ڈپارٹمنٹ نے نئی سروس پر متعدد ٹیسٹ کئے۔ اس سے بینک کو ایک اسکرین ریڈر تیار کرنے میں مدد ملی، انٹرفیس آسانی سے چلایا جا سکتا ہے اور رازداری اور سلامتی کو یقینی بناتا ہے، جس کے ساتھ معذور صارفین اپنے تمام لین دین بشمول بیلنس انکوائری اور رقم کی منتقلی کر سکتے ہیں۔
شہر کے ارلی انٹروینشن سینٹر میں بصری معذوری کی ماہر پروفیسر ڈالیا عبدل منیم کے مطابق مختلف ڈومینز میں عزم کے حامل لوگوں کو بااختیار بنانا ہمارے لئے اہمیت کا حامل ہے، شارجہ سٹی فار ہیومینٹیرین سروسز (SCHS) کی جانب سے بھی اس اقدام کا خیرمقدم کیا گیا۔
نابینا افراد، ان کے اہل خانہ، اور دیگر افراد کی جانب سے بھی بینک کی جانب سے مختلف الیکٹرانک اور دیگر بینکنگ لین دین میں سہولت فراہم کرنے والے اقدامات کو متعارف کرانے کی کوششوں کو سراہا گیا۔
