The news is by your side.

Advertisement

عمران خان آج آئندہ کے لائحہ عمل کا اعلان کرینگے

پشاور: پاکستان تحریک انصاف آج دیر بالا میں عوامی طاقت کا بھرپور مظاہرہ کرنے جارہی ہے، جلسے میں چیئرمین پاکستان تحریک انصاف اپنے آئندہ کے لائحہ عمل کا اعلان کرینگے۔

تفصیلات کے مطابق پی ٹی آئی جلسے کے لئے ٹیکنیکل کالج واڑی میں پنڈال سجادیا گیا ہے، جلسہ گاہ میں چیئرمین پی ٹی آئی سمیت مقامی رہنماؤں کی قد آور تصاویر آویزاں کردی گئیں ہیں جس پر امپورٹڈ حکومت کے خلاف نعرے درج ہیں۔

مقامی رہنماؤں کے مطابق جلسہ کا آغاز سہہ پہر تین بجے کیا جائے گا، جلسے سے چیئرمین پی ٹی آئی سمیت وزیراعلیٰ خیبر پختونخواہ بھی خطاب کرینگے، جلسے کے باعث دیر بالا میں عوام میں زبردست جوش وخروش پایا جاتا ہے اور عوام کی بڑی تعداد ابھی سے جلسے گاہ میں آرہی ہے۔

سابق وزیراعظم عمران خان کی آج دیر بالا جلسے کی تقریر نہایت اہمیت اختیار کرگئی ہے، جلسے میں عمران خان اپنے آئندہ کے لائحہ عمل کا اعلان کرینگے۔

یہ بھی پڑھیں: ‘ آج یہ کوشش کر رہے ہیں غداری کا مقدمہ کر کے عمران خان کو راستے سے ہٹائیں

گذشتہ روز پاکستان تحریک انصاف کے چیئرمین اور سابق وزیراعظم عمران خان نے بونیر میں جلسہ عام سے خطاب کرتے ہوئے کہا تھا کہ یہ باتیں کررہے ہیں کہ عمران خان پر غداری کا مقدمہ چلایا جائے، یہ چاہتے ہیں کہ مجھ پر غداری کا مقدمہ چلا کر اپنے راستے سے ہٹادیں، میں کسی امپورٹڈ حکومت کی طرح سپرپاور کےسامنے گھٹنے ٹیکنے والا نہیں ہوں۔

عمران خان نے جلسہ عام سے خطاب کرتے ہوئے کہا کہ ہندوستان، اسرائیل اور امریکا نے ملکر سازش کی، ہندوستان اور اسرائیل چاہتے ہیں کہ پاکستان کمزور ہو اور ٹوٹے، امریکا بھی نہیں چاہتا کہ پاکستان مضبوط ہو، جب ہماری حکومت گرائی گئی تو ہندوستان کے میڈیا، اخباروں میں خوشی منائی گئی، بھارت میں ایسی خوشی منائی گئی جیسے شہباز شریف نہیں بلکہ شہباز سنگھ ہے۔

Comments

یہ بھی پڑھیں