نیوزی لینڈ کی نو آموز کھلاڑیوں پر مشتمل سی ٹیم کے خلاف تیسرے ٹی ٹوئنٹی میں قومی ٹیم کی شکست پر سابق کرکٹر رمیز راجا بھی سیخ پا ہو گئے۔
سابق کپتان رمیز راجا نے آئی سی سی ٹی 20 ورلڈ کپ کو مدنظر رکھتے ہوئے نیوزی لینڈ کی نا تجربہ کار ٹیم کے ہاتھوں شکست کو شرمناک قرار دے دیا۔
قومی ٹیم کی شکست پر دلبرداشتہ رمیز راجا نے اپنے یو ٹیوب چینل پر گفتگو کرتے ہوئے کہا کہ ہار جیت کھیل کا حصہ ہے لیکن نیوزی لینڈ کی ایسی ٹیم جو اپنے نامور کھلاڑیوں کے ساتھ نہیں آئی ہے اس سے اس طرح کی شکست آپ کی بنیاد ہلا دیتی ہے۔
سابق کرکٹر رمیز راجا نے ابتدائی بلےبازوں کو پاور پلے میں فائدہ نہ اٹھانے پر تنقید کا نشانہ بنایا اور کہا کہ جو بیٹرز پچ پر سیٹ ہیں انہیں صرف 20-30 رنز بنانے کے بعد آؤٹ نہیں ہونا چاہیے تھا جس کی وجہ سے اسکور محض 180 کے قریب پہنچا، بیٹرز نے رنز نہ بناکر فرنٹ لائن بالرز شاہین اور نسیم کو مشکل میں ڈالا۔
انہوں نے کہا کہ ٹی ٹوئنٹی ورلڈ کپ سے قبل ہوم گراؤنڈ پر یہ شرمناک شکست نا قابل قبول ہے۔
کیوی بچوں سے سیریز جیتنا قومی ٹیم کے لیے بڑا چیلنج بن گیا
واضح رہے کہ پانچ میچوں کی سیریز کا ابتدائی میچ بارش کی نذر ہونے کے بعد سیریز ایک ایک سے برابر ہے اور پاکستان کو سیریز جیتنے کے لیے آخری دونوں میچز میں فتح لازمی درکار ہوگی۔
